Sommighe leerachtighe geestelijcke liedekens

[En straft my niet o Heere]

Na de wijse: Van den 6. Psalm.

Singt met aendacht.

En straft my niet o Heere^a
In uwen toorne seere,
Noch in dijn grammen moet,
Want ick ben cleyn van weere,
Swack ende teder seere
Wilt stercken Heer mijn ghemoet.^b
2 O Heer schont hier beneden,
Op mijn arm swacke leden,
Want cranckheyt hangt my an,
Wilt my ghenade gheven,
Na u woorden te leven,
O Heer wilt my stercken dan.

a Psa. 6. 2.

b Psa. 6. 2.

[p. 134]

 

^c 3 Mijn gheest die is o Heere

 

Bedruckt bedroeft so seere,

 

Met sorgh' end swaren last,

 

O Heer hoe lang salt dueren,

 

Dat ick aldus moet treuren,

 

End hier zijn des lijdens gast?

 

^d 4 Dus lag ick in der nachte

 

Gheswackt in al mijn crachte,

 

In mijn ghedacht en ween,

 

Heer gheeft tranende ooghen,

 

Dat sy doch wenen moghen,

 

Heer wilt my u ellent aensien.

 

5 O Heer doet van my keeren,

 

Dat Wonderlijck useren

 

Dat altijt is in my,

 

Groot is mijn overtreden,

 

O Heer ick moet u beden,

 

Van sterven behoet doch my.

 

6 Wie sal doch in der hellen

 

O Heer dijn lof vertellen,

 

Het is daer duyster nacht,

 

Want onder al de dooden

 

En zijn ja dijn gheboden

 

Niet ghehouden noch gheacht.

 

7 Mijn vyanden omringhen

 

My, om neder te bringhen

 

Sterckt my o Heer soet,

 

So sullen mijn vyanden

 

Beschaemt slaen haer tot schanden,

 

Dat ghy my Heer zijt so goet.

c Psa. 6. 4.

d Psa. 6. 7.

[p. 135]

 

8 Die dit liet heeft ghesonghen

 

Den strijt is hy ontspronghen,

 

God die heeft hem verhoort,

 

Te Ghent voor groot en cleyne

 

Heeft hy betuycht de waerheyt reyne,

 

Ende sterft om Gods woort.