Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens

[Ic wil met groter haestigeit]

Ic wil met groter haestigeit,
van deser weerelt scheyden,
Heer Iesus is mijn liefste lief
Na hem so wil ick beyden.

Hy is van boven neder comen

Ende hy wil voor ons strijden
Hy sterft voor ons die bitter doot,
Hy wilde uyt minnen lijden,

Och lieve heere van hemelrijc

Op u roep ick ghenade
helpt my mijner zonden quijt
Vergheeft my mijn misdaden.
O ziele dat wil ic geerne doen
maer ghy moet immer lijden
Ick leedt wel xxxiij. Iaer,
Ende al om s’menschen wille.

Ick sagh den Heere van Hemelrijck

Al in Ierusalem rijden
Die cleederen werden voor hem ghespreyt.
Ende oock die groene rijsen.

Als hy weder uyt Ierusalem ging,

met also grooter smerten
So volghde hem zijn liefste Moeder na,
Met bedruckter herten.

Gaet thuyswaert, sprac hy Moeder mijn

Ende weest dijns drucx genesen
En kiest Ioannen tot een soon
Hy sal u trooster wesen.

Neme ick hem tot eenen soon

Hoe salt mijn herte ghelijden
So en sal ick tot gheener tijt
My moghen verblijden.

Iesus sprack, lieve moeder mijn,

het moet immer wesen
Den doot die ic hier sterven sal
daer sal Adam by ghenesen,

o lieve kind moet immer sijn

Hoe sal ick dat verdragen
so mach ic onder den cruyce staen
Ende jammerlijcken clagen.

Als sy was onder den cruyce ghestaen,

sy sagh haer kint daer hangen
haer liep so menigen heten traen
Al over haer soete wanghen.

O Iesu lieve Heere mijn

Wilt doch mijn ziele geleyden
Al door die weerde moed dijn
Als sy van hier sal scheyden.