Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens
(ca. 1625)–Anoniem Schoon suverlijck boeckxken–
Auteursrechtvrijop de wijse: O Radt van avontueren.Hoort toe ghy kersten sinnen
En wilt niet zijn beswaert,
Alle die Gods woort beminnen
So ons Iohannes verclaert
Int sevenste Capittel beschreven:
Hoe Iesus smorghens vroegh,
Ghecomen is in den Tempel,
Leerende ‘tvolck menigh goet exempel,
Die Pharizeen hadden spijts ghenoegh.
Die Pharizeen quaet van ghedachten
Quamen voor Iesus op dat pas,
Een vrouken dat sy brachten,
Die in overspel bevonden was,
Sy seyden: Meester, dese vrou is bevonden
In overspel met boosen gheschal,
dus wilt hier vonnisse over gheven.
In Moyses wet daer staet gheschreven
Dat men dusdanighe steenen sal.
Om Iesus t’achterhalen,
hebben sy desen list gheleyt,
| |
[pagina 64]
| |
Want hy met soeter talen
Altoos sprack van barmhertigheyt
Om Iesus t’ondersoecken,
Oft hy soudt hebben gheseyt
Dat mense soude steenen
Dit was haer lieder meenen
dat en ware gheen barmhertigheyt,
Christus die Heere vol waerden
Die boogh hem neder saen
Ende schreef daer in der aerden
Want sy selve hadden misdaen
Sy saghen daer int ronde
Op malcanderen al ghemeen
Hoort wat hen Christus oorconde
Die van u lieden is sonder zonde,
Die worpe den eersten steen.
Hier by moghen wy bedieden
Dat een yeghelijck wel verstaet
Sijn hoeveken suyver sal wieden,
Eer hy in eens anders gaet
En wilt gheen vonnisse gheven,
Daer ghy selve in beschuldight zijt
Want sy saghen daer beschreven
haer misdaet dat sy hadden bedreven
D’welck ons d’Euangelie belijdt.
Die Pharizeen ghemeene,
Sijn al te samen wegh ghegaen,
Ende lieten daer alleene,
Het Vrouken voor Christum staen
Christus al sonder sparen
hy vraeghde ’t Vrouken saen,
Waer dat zy waren ghevaren
Al die haer quamen beswaren,
Ende haer beschuldight haen.
Heeft u yemant verdoemt van desen,
Heeft Christus dat Vrouken ghevraeght,
Och niemant, Heer ghepresen,
| |
[pagina 65]
| |
Sprack dat Vrouken seer vertsaeght
So en wil ick u oock niet verdoemen
Sprack tot haer Christus die Heer
En dient gheen vreemde af-goden,
Gaet, leeft na mijn gheboden,
Ende en zondight voortaen niet meer.
Die barmhertigheyt ons Heeren
Moghen wy hier verstaen,
Elck die hem wil bekeeren,
Al is hy met zonden belaen,
Wil hy voort deughdelijck leven,
Hy wort door Christus bevrijt,
maer en wilt gheen oordeel gheven
Daer een ander om soude sneven
Op dat ghy oock niet gheoordeelt en zijt.
|
|