Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens

Een nieu liedeken,

op de wijse: den lustelijcken Mey is nu in den tijdt.

Hoort ghy zondaers al ghemeyn
wilt niet mistroostigh wesen
Gaet al tot Christus dat edel greyn
Die mach onsen druck ghenesen,
So die Schriftuere uytleyt,
Is Godt altijt bereyt,
Te vergheven onse misdaden,
Christus spreeckt: comt alle die zijt beladen.

[p. 62]

 

Godt heeft ons so lief, dat hy ons bemint,

 

Esaias doet ons dat weten,

 

Al waert dat een Moeder haer eyghen Kint

 

Soude moghen vergheten,

 

hy en vergheet ons nemmermeer

 

Sprack Christus die almoghende Heer

 

Want wy zijn alle zijne graden,

 

Christus spreeckt: comt alle die zijt beladen.

 

Magdalena die men die zondersse heet,

 

haer mocht men wel aenschouwen,

 

Ende van Zacheus niet en vergheet,

 

Daer hy een mael-tijt gingh houwen

 

Noyt zondaer en quam daer so groot,

 

Die hy zijn jonste niet en boot

 

hy toont haer zijn ghenaden,

 

Christus spreeckt: comt alle die zijt beladen.

 

Hy is de wegh, als daer staet beschreven

 

Een Heer boven alle Heeren,

 

Die waerheyt is hy, ende oock dat leven,

 

Waer wilt ghy anders keeren?

 

hy is die deure die open staet,

 

daer men tot den Vader gaet,

 

Niemant en wil hy versmaden,

 

Christus spreeckt: comt alle die sijt beladen.

 

Dus wilt betrouwen in Godt des vreden,

 

Wilt zijn gheboden houwen

 

Ende en wilt buyten de wegh niet treden

 

So sult ghy zijn Rijck aenschouwen,

 

Ende hout altijt accoort

 

Ende zijn Goddelijck woort,

 

Wilt treden na sijn paden,

 

Christus spreeckt: comt alle die zijt beladen.

 

Godt worde voor ons aent cruyce ghereckt,

 

Met sijn ghebenedijde leden,

 

Die Ioden hebben hem so seer begheckt

 

D’een Moordenaer heeft hem ghebeden,

 

Met woorden soetelijck,

[p. 63]

 

Beloofde hy hem zijn Rijck,

 

Noch en quam hy niet te spade,

 

Christus spreeckt: comt alle die zijt beladen.

 

Prince.

 

O Princelijcke Godt in der eeuwigheyt,

 

Roept Heere comt ons te baten,

 

Sijn armen heeft hy uytghespreyt

 

Hy en wil ons niet verlaten,

 

Hy is eeuwigh ghebenedijdt,

 

Peynst dit wie dat ghy zijt,

 

Ende wilt u wijsselijcken beraden,

 

Christus spreeckt: comt alle die zijt beladen.