Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens
(ca. 1625)–Anoniem Schoon suverlijck boeckxken–
AuteursrechtvrijOp de wijse, O Rat van avontueren.Heere Godt leert ons beden
Wt vierighe herten gront
Af-neemt ons quade zeden,
Die wy hebben in den mont
Een Liedeken willen wy singhen,
So ghy ons hebt gheleert,
Doet my mijn hert ontspringhen
Dat ick my leere bedwinghen,
So wort mijn vreught vermeert.
O Heere Godt onse Vader,
Die daer in den Hemel zijt,
Nu helpt ons alle gader
Wt desen bedroefden tijt
So en worden wy niet bedroghen,
Al van des Duyvels Serpent,
wy worden so dickwils beloghen,
dus bidden wy Godt van hier boven
Die alle herten kent.
Gheheylight sy uwen name,
Toecomende is ons u rijck
| |
[pagina 60]
| |
Nu wilt ons doch maken bequame
Ons Christenen alle ghelijck,
Dat wy u woorden bewaren
Dagh, avont, ende nacht,
En laet ons niet vervaren,
Al van die Helsche Scharen!
Ghy hebbet die meeste macht.
Vwen wille gheschiede op der Aerden
Als hy in den Hemel doet,
Dat nemen wy al in waerden,
Al ist in teghenspoet,
Gheeft ons verduldigh lijden
Wat teghen uwen wille staet
O Heere wilt ons verblijden
Stelt uwen toren bezijden,
Ons arme doch niet en versmaet,
Noch bid ick, Heere, wilt ons gheven
Dats heden ons daghelijcx broot,
Daer die ziel moet by leven,
Dat hebben wy meest van noot
Ghy hebbet selve ghesproken,
Dat sal ons best versaen,
Diet lesen wil, mach dat soecken
Het staet gheschreven in boecken
En laet ons daer niet af gaen.
Wilt onse schult vergeven
Ghelijck wy onse schuldenaers doen
Op dat wy niet en sneven,
Al in die Helsche gloen,
Dat wijse souden moeten lijden,
Ende eeuwigh sterven die doot
O Heer wilt ons verblijden,
In u toecomende tijden,
V barmhertigheyt is so groot.
En laet ons niet becooren,
Maer verlost ons van allen quaen,
Ons vleesch is so cranck ghebooren
| |
[pagina 61]
| |
Ten can niet wederstaen,
De weerelt doet ons bedrieghen
So menighmael op eenen dagh
Godt woort en mach niet lieghen,
Laet sweerelts ghenuchte vlieghen
Die u niet helpen en mach.
O Heere wilt ontfanghen
Van ons dit schoon ghebedt
Wy hebben so grooten verlanghen
wy worden so haest belet,
wy worden so haest verwonnen
Van also cleyne saeck
Dus zijn sy out oft jonghen,
Elck wacht hem van quade tonghen
So crijghdy in Gods woort smaeck,
Die ons dit Liedeken dichten,
Die was vol fantasijen:
Ons Heer wilt hem verlichten
In der eeuwigheyt verblijen,
Ende dat hy mach verwinnen
Alle zijn lijden groot
Elck wil hem versinnen
Laet ons Godt met herten beminnen
Die voor ons sterf den doodt.
|
|