Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens

Een schoon Liedeken,

op de wijse vant Liedeken van Munster.

Adam was een verlooren man,
Groot leet heeft hy ons ghegheven aen,
Dat claghe ick boven maten:
Verloren heeft hy zijn edelheyt
Daer hy was gheschapen.

Met Adams vleesch ben ick ghequelt,

Alle mijn natuere is my ontstelt:
Adam, ghy doet my sterven,
Ghy quelt mijnen gheest al totter doot,
Mijn ziel wilt ghy bederven.

Die weerelt comt met t’groot ghedranck,

Mijn boose natuere raedt my so banck,
Die vyandt wacht op ramen
Oft hy die ure gheraken can,
Dat hy my mochte beschamen.

Keert weder, keert weder, O edel ziel,

Ghy hebt verloren dat schoonste Priel,
Den Hemel met al zijn losten:
Ghy en comter waerlijck nemmermeer
Het sal u moeten costen.

Het sal u costen vleesch en bloet,

Al waer die weerelt fijn van goude root,
Ghy soudtse moeten derven,

[p. 47]

 

Ende slaen den zondighen Adam doot,

 

Oft ghy moet immers sterven.

 

Daer voor is Christus leven goet,

 

Het gheeft die Ziele eenen goeden moet,

 

hy is voor ons ghestorven,

 

Den eeuwighen doot maeckt hy te niet,

 

die helle heeft hy bedorven.

 

Door Gods woordt worden wy ghetroost,

 

Van alle onse vyanden sijn wy verlost,

 

Men vindet claer beschreven,

 

Wie gantsch van herten in Godt ghelooft,

 

Die heeft dat eeuwigh leven.

 

Sijt ghy dan een kersten man,

 

So neemt dan een kersten leven an,

 

Weest vroom ende onverslaghen

 

Sijn jock is soet, sijn last is licht,

 

hy wil ons helpen draghen.

 

Weest vrolijck in uwen wederspoet

 

daer toe doet alle uwe Vyanden goet,

 

Doet vruchten in uwe daghen,

 

Ende slaet uwen armen broeder by

 

So sult ghy Godt behaghen.

 

Aldus heeft Christus ghedaen

 

Cont ghy die Schriftuere wel verstaen

 

In woorden en oock in leven,

 

Door-siet Christus lustigh exempel aen

 

het sal u wel beweghen.

 

Gheeft Godt onse Heere prijs ende danck

 

hy die de waerheyt ons maeckt becant

 

Door zijnen Gheest van boven,

 

Verleent daer toe oock sijnen Kinderen soet,

 

Dat sy u eeuwigh loven.

 

Prince, wilt Godt dienen soo ’t behoort

 

Ende blijft altijt by Christus woort,

 

Ende wilt u daer toe keeren,

 

Wat ghy uwen even naesten doet,

 

Dat doet ghy onsen Heere. Amen.