Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens

[p. 45]

Een Geestelijck Liedeken,

op de wijse: Meyskens wat heeft u den Rocken ghedaen.

O mensch, wat heeft Christus misdaen,
Dat ghy hem niet wilt kennen:
Hy wil u alsoo mindelijck ontfaen
Wt broederlijcke minnen:
Hy wil u schencken zijn Rijck certeyn,
Ende maken u alle zijn goet ghemeyn,
O mensch wilt hier op sinnen.

Dat Rijck is van deser weerelt niet,

Dat ons de Heere wil gheven,
Al lijdt dat vleesch, druck, lijden en verdriet,
Die ziele comter door in’t leven:
Iae wie druck lijden, can wel verstaen,
Hy sal voor druck, in vreughden gaen,
Als Paulus heeft beschreven.

Pharao hadde vercreghen die macht,

Dat onnoosel bloet te drincken,
Om dat sy dat Babylonische rijck niet en acht,
Dat cortelijck moest versincken:
Wie volstandigh blijft tot in der doot,
Die sal zijn des Bruydegoms Bruydt ghenoot,
O mensch wilt hier op dincken.

Alle die Christus volghen naer,

Die weerelot sal hem haten:
Men vint int Euangelie claer,
O mensch, wilt die weerelt verlaten:
Nu siet ghy mannen wat ghy doet,
Dat ghy niet en stort het d’warachtigh bloet,
Ten soude u ziel niet baten.

Die ons dit Liedeken eerstmael sanck,

Hy hevet wel ghesonghen:
Hy hevet ghesonghen uyt liefden bedwanck,
In spijt verraders tonghen.
Hy bidt dat elck zijn beste doet.

[p. 46]

 

Soo mach hy comen aen dat eeuwighe goet

 

Dat ons is toe ghedronghen.

 

Nota.

 

Dient Godt vier uren alle daghen,

 

Drye uren neemt voetsel t’uwen behaghen,

 

Slaept seven uren, oft cont ghy, min,

 

Dan sorght acht uren om u ghewin:

 

Twee uren moeght ghy verscherpen den sin,

 

Wilt dus den tijt smaldeeligh kiesen,

 

Soo en sult ghy ziel noch tijt verliesen.