Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens
(ca. 1625)–Anoniem Schoon suverlijck boeckxken–
AuteursrechtvrijOp die wijse: Tis heden een dach van vrolijckheyt.Doe Iesus gheboren wert
Tot Bethlehem in der stede,
Doe rees daer op al met der vaert
Een schoon sterre daer mede:
Drie Coninghen worden daer ontwaer
Dat die sterre scheen soo claer:
Sy seyden oock alle ghelijcke,
Den Ioden is een Coningh gheboren,
Ons bidden en is niet al verloren,
Wy soecken hem al in dat Iootsche Rijcke.
Die Coninghen scheyden doe van daer,
Sy en wouden niet langher beyden,
| |
[pagina 38]
| |
Die sterre scheen voor hen so claer,
Sy woude hen rechte leyden:
Sy was lichter als den dach,
Sy hielden altijt den rechten padt,
Haren ganck was by der aerden,
Hare weghen waren also menighfout
Onse Godt hadde die sterre bout,
Tot die Ioden dat sy keerden.
Tot Ierusalem dat sy quamen,
Die sterre bleef verloren:
Sy vraeghden: weet dat niemant van
Waer is dat kint gheboren,
Een teecken hebben wy ghesien,
Wy hebben een sterre ghesien
Also verre in Oostenrijcke,
Het en can ons al niet ontgaen,
Wy willen hem bidden aen
Wy drie oock alle ghelijcke.
Doe Herodes dat vernam,
Sijnen angst en was daer niet cleyne,
Hy wert in zijnen sinnen gram
Ende alle die stadt ghemeyne:
Hy liet halen die oudtste Meesteren,
Ende daer toe wijse Priesteren,
Die waren uytvercoren:
Ghy Heeren, een dinck heb ick ghehoort,
Dat sult ghy my maken vroet:
Waer is dat kint gheboren?
Sy seyden alle, dat is waer,
Te Bethlehem ist gheboren,
Dat sprack een Propheet claer
So menigh Iaer te vooren.
Doe Herodes hadde vernomen,
Die drie Coninghen liet hy voor hem comen,
Hy vraeghde hen heymelijcke:
Ghy Heeren, hoe sal ick dat verstaen,
Waer saeght ghy die sterre opgaen?
| |
[pagina 39]
| |
In uwen Coninckrijcke.
Die Heeren dochten daer in gheen quaet,
Sy deden hem openbaren:
Herodes sprack ick gheven raedt,
Te Bethlehem sult ghy varen.
Dat kint suldy vinden daer,
Dat segh ick u al openbaer,
Dat heb ick soo vernomen.
Als ghy weet waer dat kindt is,
Soo maket my dees dinghen wis
Als ghy weder comet.
Soo willen wy comen als wy eerst moghen
Ende doen hem groote eere,
Dat kint willen wy bidden aen
Voor eenen rechten Landtsheere.
Die Coninghen scheyden doen van daer,
Die sterre scheen voor hen soo claer
Ende die sterre woudese recht leyden:
Die sterre scheen voor hen soo claer,
Also langhe als sy bleef staen
Daer Maria ende Ioseph ware.
Sy traden in dat huys alle drie,
Daer toe en was niemandt leede:
Sy vonden dat kint, schoon, edel ende claer,
Maria ende Ioseph mede:
Ende sy vielen op haer beyder knyen,
Sy baden dat kindeken alle drie
Met heetelijcker minnen.
Sy locken op, haer schat was bont,
Sy offerden Myrrhe, Wieroock ende Gout,
Met alsoo hertelijcker minnen.
Des nachts ontrent der middernacht
Doe quamen in haer droomen,
Sy en souden tot Ierusalem niet keeren
Ende niet tot Herodes comen,
Ende sy waren doen also wel ghetroost,
Sy waren al van Herodes verlost,
| |
[pagina 40]
| |
Sy en wouden niet weder tot hem comen,
Sy waren doe alsoo wel ghemoet,
Sy cozen een ander wegh, was goet,
Al na hare Coninghrijcke.
|
|