Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens

Een nieu Liedeken vant nieuwe Iaer.

Ontwaeckt nu Israel, doet op u ooren,
Wilt hooren nae der Propheten stem:
Die ons langen tijt was belooft te vooren
Die is nu gheboren in Bethlehem,
Soo ons die Schriftuere tuyght van hem,
So sal hy wesen ons middelaer:
Wilt vreught bedrijven, mannen en wijven,
Al in dat soete nieuwe Iaer.

Een sterre uyt Iacob is opgheresen,

Soo als Balam heeft ghepropheteert:
Abrahams ghelofte is gheschiet door desen,
Ons Salighmaker is ghedescendeert,
Den dach die Symeon heeft begheert
Die is nu ghecomen, noyt blijder maer:
Wilt vreughden rapen, ghy Christen schapen,
Al in dat soete nieuwe Iaer.

Den bandt van Adam is ghebroken,

Vrede wert vercondight over al Aertrijck.
Daer ons Ioannes af heeft ghesproken,
Is nu ghecomen tot aller tijt,
Wt liefden gheworden mensch, ons ghelijck,
Om ons te verlossen alle gaer,
Wilt hem aencleven, om zijn woort te beleven
Al in dat soete nieuwe Iaer.

Ierusalem wilt u verblijden,

Ghy dochter van Syon, laet droefheyt staen:
Ons Salighmaker is nu ten tijden

[p. 37]

 

Gheboren nae der Schriftueren vermaen,

 

Die herderkens hebben die bootschap ontfaen,

 

Dat licht schijnt in die weerelt claer

 

Wilt hem aenbeden met vrolijckheden

 

Al in dat soete nieuwe Iaer.

 

Ghy Heydenen wilt nu ontwaken,

 

Want dat woort is vleesch geworden rechte voort

 

Ende wilt den ouden Adam versaken,

 

Want dat woort is God, ende God is dat woort

 

Door hem gheheel comt ons confoort,

 

Door niemant anders, alsoo voorwaer

 

Wilt hem aencleven om zijn woort te beleven

 

Al in dat soete nieuwe Iaer.

 

Prince der Acolijen, dit is u gheschoncken

 

Al van de broeders, liefde is ‘tfundament,

 

Nu laet Gods woort in u herte voncken,

 

T’welck van den Vader is neder ghesent.

 

Ghecomen uyt der Hemelen tent,

 

Om ons te verlossen alle gaer:

 

Dus wilt hem loven, die daer was verschoven

 

Al in dat soete nieuwe Iaer.

Amen.