Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens

[Heer Iesus, kerst van Nazarene]

Heer Iesus, kerst van Nazarene,
Ghy zijt ghebooren van een Maget reene,
Daerom zijdy ghebenedijt.

Herodes hevet vernomen

Daer is een nieu Coningh ghecomen,
Die rijcker soude zijn dan hy.

Heer Iesus kerst.

[p. 27]

 

Herodes heeft gheswooren,

 

Hy sal alle Kinderen dooden in tooren,

 

Die onder twee Iaren zijn.

 

Heer Iesus kerst.

 

Doe Maria dat verhoorde,

 

Dat men alle kinderen vermoorde

 

Ioseph laet ons varen tis meer dan tijt.

 

Heer Iesus kerst.

 

Maria quam aldaer ghevaren,

 

Daer een man sijn cooren saeyt,

 

Sy groete den man, sy reedt voor by.

 

Heer Iesus kerst.

 

Godt groet u man die daer saeyde

 

Comt hier yemant die na my vraeght,

 

Wijst hem voor by.

 

Heer Iesus kerst.

 

Herodes quam al daer ghevaren

 

Daer een man sijn Coren maeyde,

 

Hy sprack, hy reedt voor by.

 

Heer Iesus kerst.

 

Seght my man, daer ghy maeyt

 

hebdy niet een vrouwe sien varen

 

Met wit habijt.

 

Heer Iesus kerst.

 

Doe ick saeyde dat ick nu maeye,

 

Doe quam hier een vrouwe ghevaren

 

Met wit habijt.

 

Heer Iesus kerst.

 

Herodes sprack tot sijnen Heeren,

 

Wy willen weder t’huys-waert keeren,

 

Sy mach wel uyt den Lande zijn.

 

Heer Iesus kerst.

 

Herodes sprack tot sijnen lieden,

 

hoort wat ick u sal ghebieden,

 

Gaet ende soecket kindekijn.

 

Heer Iesus kerst.

 

Sy ginghen van lande te lande varen

[p. 28]

 

Die onder twee Iaren waren

 

Die dooden sy.

 

Heer Iesus kerst.

 

Doe waenden sy ’t kindeken te verdoen,

 

Maer het was in Egypten ghevloen,

 

Ende en wilde niet ghedoot zijn.

 

Heer Iesus kerst.

 

Duysent, ende xliiij. duysent

 

Waren ghedoot kindekijn.

 

Sy willen alle Gods Enghelen zijn,

 

Heer Iesus kerst.

 

Nu bidden wy desen kinde,

 

Dat hy ons wil bringhen

 

In zijn eeuwigh rijck.

 

Heer Iesus kerst.