Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens


[Had ick vleughelen als een Arent] Had ick vleughelen als een Arent grijs, Ick soude so hooghe vlieghen, Daer boven in dat Paradijs, Tot mijnen soeten lieve. Dan soude ick segghen Vader mijn, Wanneer suldy my halen Wt deser ellende van Aertrijck,
[pagina 24]
In uwer hooghster salen. Waer is de dochter van Syon Ick wilse vrolijck maken, Ick wil haer een bootschap doen Van also blyden saken. Die hooghste in der minnen, Dat is Iesus Marien Sone Godt laet ons hem ghewinnen, Hier boven in den throone. Dat Hemelrijck ende Aertrijck Noyt conste ontluycken, die sal een suyver maghet reyn In haren Lichaem besluyten. Die duysternisse is verclaert dat licht is ons gheresen, Een maghet heeft een Kint ghebaert, dat mach wel wonder wesen. Dat kint was teder ende cranck Een maghet moester voeden Tis recht dat wy’t hem weten danck Dan sijner grooter ootmoeden. Heer Iesus kerst, wat hebdy gemeent Wy souden u so gheerne vraghen, dat ghy dus licht en weent Ghy sijt so jongh van daghen. Dat dus viel en dat was onghereet, dat moghen wy nu ghebruycken, Dat Adam in den Appel beet dat dede den Hemel sluyten. O moeder Gods van Hemelrijcke, des Coninghs in den throone, Bidt voor ons allen innerlijcke, Iesum uwen Sone. Dat wy daer boven moeten V ende uwen kinde groeten, dat wil ons Godt ghehinghen. Amen.