[Het was een Maghet uytvercoren]
Het was een Maghet uytvercoren
Daer Iesus af wilde zijn gheboren,
Dus ben ick vro. O, o, o, o, benedicamus domino.
Al tot der stadt van Nazareth.
Daer is een Maghet onbesmet,
Des ben ick vro. O, o, o, o, benedicamus.
Groetse my met den name mijn:
Seght dat ick haer kindt wil zijn,
Des ben ick vro. O, o, o, o, benedicamus.
Die Engel was een bode goet,
Hy voer derwaerts met der spoet,
Des ben ick vro. O, o, o, o, benedicamus.
Hy seyde: Godt groet u suyver Maeght,
Ghy zijt die Gode seer wel behaeght,
Des ben ick vro. O, o, o, o, benedicamus.
Hy wil van u gheboren zijn,
Iesus die lieve Meester mijn,
Des ben ick vro. O, o, o, o, benedicamus.
Maria sprack: hoe mocht ick hem ghewinnen,
Want ick noyt man en geerden om minnen,
Des ben ick vro. O, o, o, o, benedicamus.
De Heylighe Gheest sal in u comen,
Soo den dauw valt op der bloemen,
Des ben ick vro. O, o, o, o, benedicamus.
Maria weest onvertsaeght,
T’is den Gods sone die ghy draeght,
Des ben ick vro. O, o, o, o, benedicamus.
| |
Hy heeft u daer toe vercooren,
Hy wil u verlossen dat was verlooren,
Des ben ick vro. O, o, o, o, benedicamus.
Van alle sorghe ben ick ontslaghen,
Die deerne Gods wil ick wesen,
Des ben ick vro. O, o, o, o, benedicamus.
Maria viel neder op haer knyen,
Den wille Gods moet gheschien,
Des ben ick vro. O, o, o, o, benedicamus.
|
|
Auteursrechtvrij