Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens


[Ons is ghebooren een Kindekijn] Ons is ghebooren een Kindekijn, Daerom so willen wy vrolijck zijn Laet ons hem dienen met herten fijn Want sijnen Naem is Iesus, Vala, sus, sus, sus. sprack Maria tot Iesus. Doe baerde die maget Maria bly, So en was daer niemant by Dan Ioseph die behoeder vry, Haer have hadden sy ghelaten t’huys. Vala sus. Als onse Heere ghebooren was, Ende Maria daer af ghelagh, So men in de Schriftueren las, Van gheenen man hadde sy confuys. Vala sus. Men leyde den Heer in der Cribben Van hoy was ghemaeckt sijn bedde Aen beyde zijden quetste hy sijn ribben, Nochtans bleef hy Dominus. Vala sus. Een osse ende een cleyn Ezelkijn Verwermden die leden zijn, Van couden weende dat kindekijn, Nochtans bleef hy Dominus. Vala sus. Die Herderkens op den velde laghen Sy begosten haer te vertsaghen,
[pagina 20]
Van een claerheyt die sy saghen, Sy hadden gewilt wel wesen t’huys. Vala sus. Die Enghel sprack, weest niet vervaert, Ons is gheboren een nieuwe standaert: Hy sal den vyant maken confuys, Die Herderkens songhen, ha, ha, ha, Ons is gheboren soo ick verstae, In excelsis gloria, Et in terra pax hominibus.