Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens



[pagina 15]
Een nieu Liedeken,
op de wijse: Puer nobis Nascitur. Waer is de Dochter van Syon Ick soudese so blyde maken Ick soude haer een Bootschap doen, Van also groote saken. Doe gingh een Maghet sware, Te Bethlehem, daer sy doe bleef Ende ontfingh haer kindt aldare. Een glas al schijnter doore Ten breeckt niet van der Sonnen Dus heeft die Ionck-vrou na en voor Ionck-vrou, een Kindt ghewonnen. Een duysternis is ons verclaert, Een licht is ons geresen, Een Maghet heeft een Kint gebaert, Dat dunckt my wonder wesen. Nu is hy teder ende cranck, Een Maghet sal hem voeden, Wy moghent hem al wel weten danck Van sijner grooter armoeden. Hy toont sijn goedertierentheyt Ny en was hy verbolghen Hy drijft so grooten ootmoedigheyt Wy en connen hem niet na volghen. Maria nam hem op haren schoot, Sy custen aen sijnen monde, Die minne hadde sy also groot Tot hem in alle stonde. O Heere lof moet u altoos sijn Wilt ons dan gheleyden, Met die weerde Moeder dijn, Als wy alle van hier scheyden.