Wo men den clagher antworden sal off nicht. LXIII. (III. 71.)
Een yghelic man die men beclaghet, die mach wel weygheren te antworden, tensi dat men hem beclaghe mitter spraken daer hi van gheboren is, so moet hi antworden of sijn voor sprake, also dattet die clagher ende die rechter verstaen moghen. Heeft hi ooc in Duytsch gheclaghet of gheantwort of ordel ghevonden voor gherichte ende mach men hem dat betughen, so moet hi ooc in Duytsch antworden behalven voor den keyser, want daer so heeft elc recht te rechten na synre gheboorte 1).
Men en dwinghe hem aldaer niet dat hi Duytsch spreke die gheen Duytsch en can, mer men dwinghet hem aldaer toe, dat hi enen voirsprake crighen moet die dat antwort verstaet, also als men den clagher daertoe dwanc dat hi enen voirsprake crighen most.
Auteursrecht onbekend