De Saksenspiegel in Nederland

Wo men enen vredelosen man vertughen sal ende waer men den vertughen sal. XXIII. (III. 24.)

Men en mach genen man vertughen noch verwinnen mit een vervestinghe in enen anderen gherichte ¹). Wie in den nedersten ²) gherichte vervestet is die en is in den hogesten nicht vervestet ³), ende wie in den hoechsten gherichte vervestet is ⁴) die is in allen rechten vervestet. Die nederste rechter die en moet die vestinghe niet rechten die sijn overste rechter ghedaen heeft, tensi dat hi hem also vriendeliken si ende hem die saken also weteliken sijn ⁵), dat hi selve tuuch wesen wil in des hoochsten rechters stede of des noot is ⁶).

Wie enen man gripet in enen anderen gherichte, gripet hi hem dan an in een ander gherichte ende brenghet hem voor den rechter daer hi niet vervestet en is, ende wil hem daer vertughen mitten rechter die hem vervestede, so en mach die rechter daer niet tughen als een rechter, want hi en is gheen rechter dan in sijns selfs gherichte. Hiervan so is dat een biwoort dat daer seecht, dat men ghenen tuuch over velt voeren en mach.
Ende dese rechter mach ooc gheen tuuch wesen, want hi en weet daer niet van dan van horen segghen. Ende van segs woerden soe mach gheen man tuuch wesen..