De Saksenspiegel in Nederland

Van den di een dinck leend wort to ener tijt ende off he dat daer over beholdet wat he dar vor doen sal. XXI. (III. 22.)

Wie den anderen leent een cleet off een paert tot eenre besceidenre tijt toe, ende behout hi dat over die tijt ende wort daerom beclaghet, so sal hi dat gheleende dinck weder gheven ter stont ¹) of beteren dat, ist dat hi dat dinck gearghet heeft ²). Een man moet hem ooc wel onderwinden sijns goets waer hi dat siet ³) mit recht, dat men hem te voren mit onrecht onthelt ⁴).

Nadien dat de sculde menigerhande sijn, so sijn die rechten oec daer op menigerhande.
Dat hi sijn goet wael peynden of besetten moet ende daerop claghen, mer ghenes dieftes noch roves. So en mach men hem daermede besetten noch beletten noch oec bethyen, dat hem aen sijn lijf gaet. Een dinck wort wael dieftich of ghestolen goet, dat diegheen die dat heeft daermede noch gheen dief en wort, dat men hem daer mede niet hanghen en mach.