Off men enen manne beclaget van ener mysdaet dat he nicht yeghenwordich is wo men dar mede varen sal. XIII. (III. 13)
Wort een man voor gherichte beclaghet om een misdaet 1), daer hi niet teghenwoordich en is 2), ende wort hem dach ghegheven 3), ende die clagher hem aen coomt binnen dien daghen, so moet hi hem daer voor wel besetten laten om sijn scolt te rechte, also langhe went hi borghe settet 4) voor gherechte te comen. Want die rechter wervet yo vrede denghenen die daer claghen 5).
Dat al des rechtes meninghe daerop gaet dat die bose dryfticheit ghestoort wort.
Dryfticheyt komt toe drierleye wys. Wanneer een man teghens recht doet, hi si oec hoe edel dat hi si, want wat een teghens dat recht ghesciet, dat is also veel oft niet ghesciet en waer. Wanneer an enen man broken ende misdaden is, dat hi dan hem selven rechten wil, hoor pijn is datse hoor rechte tot onrecht maken. Dese rechticheit hiet inder ee vorderinghe, ende dese rechticheit verliest hi. Wanneer een man broken ende misdaden heeft, dat hi hem dan niet vernijden en wil ende gaet also strack recht of hi oorlof had dat te doen, deser pijn is dat men hem wel besetten mach wen ter tijt dat hi borghe set.
Auteursrecht onbekend