waghen, so gift men hier van die helft te tollen 1). Papen, ridders ende hoor ghesin, die sullen tollen vri wesen, si varen of si riden, waer si oec scepes behoven dan niet, ende te recht 2) so sijn si oec gheleides vri 3). Ende wie dat men gheleide ghift die sal men oec gheleide waren, of die ghene sal den scade betalen die hem die gheleede ghaf. Een ledich waghen gift half tollen teghens enen gheladen waghen, den halven dat is een karre die ghift halve tollen 4). Wie enen onrechten wech slacht over ghewonne of ghebouwet lant 5), die ghift voor een yghelic rat enen penninc, die ridende man enen halven, ende sullen daer toe den scade beteren diese ghedaen hebben, indien dat daer zaet opten lande staet, ende daer voor moet mense wol panden. Beweren of onthouden si hem dat pant teghens recht so beroopt mense mitten gherochte 6), ende dan so moeten si dat gherocht beteren met III scillinghen ende moeten doch pandes recht doen 7).
Of alsulcdanich goet mit Gode mach wesen? Sommighen segghen neen, want het heeft een beghin van de giericheit. Ic segh hierop aldus: so waer datment te recht hout, daer ist sonder sonde, want die keyseren hebben dat gheset ende watse setten dat is een recht. Het is oec opghecomen door dat ghemene goet ende niet van ghiericheit, want den tollen ghift men te hulpen den weghen dat mense daermede beteren mach als hier staet. Ende wort hem also veel tolles niet daerse die brugghe of togen om hueden moghen so moeten si die brugghe van horen eyghenen goede tymmeren ende maken ende beteren. So papen ende ridders om ghewin comanscap deden so en waren si niet tollen vri.
So welcken wech, steghe of strate, die over een acker een iaer heeft gheleghen, sonder ghewelt ende ooc sonder oorlof, openbaer ende niet heymelic, die en mach gheen man verbieden.
Dat men den gheruchte beteren sal daer houden hem die gierighe rechters aen en segghen: men sal alle gheruchten beteren mit drie scellinghen.
Auteursrecht onbekend