De Saksenspiegel in Nederland

Van denghenen de ghenen borghen settet dar vor gherichte ⁴). V. (II. 5.)

So wie eyghens goets also veel heeft dat dat goet beter is dan sijn weerghelt binnen den gherichte ⁵), die en derf gheen borghe setten of men hem om een ongherichte of misdaet beclagede. Alle scult die men voir gherichte winnet, die sal men betalen over XIIII nachten ende alle broken binnen ses weken ende alle bothe over XIIII nachten daer na ⁶) als die broken betaelt sijn. Winnet oec een man sijn bothen eer die broke betaelt is ⁷), so sal men die bothen betalen binnen VI weken, ende die broken daer na over XIIII nachten. Tot des mans huus salmen die broken ende bothen betalen, die men daer sculdich is ⁸), bij sonnen schijn, indien dat hi een huus heeft binnen den gherichte of tot des naesten rechters huus ⁹).

Alle sieken en sterven niet ende al die beclaghet worden die en hangt men ooc niet. Indien dattet gheen hantachtighe daet en si, want dan so worde hi ghelike wel ghevanghen al had hi noch so veel eygens goets.
Hoe dan of hi niet en woude in des mans huus gaen die hi dat betalen soude of dat hi hem in syn huus niet en woude laten gaen. Want een man mach dat den anderen wel verbeeden. Segghe dat hi dat voer die deur laghe of dat hi ooc dat daer in werpe, ende si des los en vri indien hi des tuuch hebbe.