De Saksenspiegel in Nederland

Van des gheboernen gogreven ende des beleenden rechters vervestinge ²). XCIII. (I. 71.)

So wien die gheboren gogreve of die beleende rechter voor den grave vervestet ende tughet sijn vervestinghe voor hem, hi verwerft des graven vervestinghe althant ³) over den misdader of over den ghenen die daer onghehoorsam is. Aldus so verwerft hi des graven vervestinghe ende ooc des keysers achte ⁴).

Van den gogreve dat saltu verstaen in eenre graefscap ende van den beleenden rechter dat is inder mercken. Hier hebstu van den sydesten rechteren. Dese twe die moghen alleen die nederste vervestinghe daer mede verhoghen. Dit mach die gheboren grave niet doen, want hi en mach niemant vervesten. Dat en is in der Sassen recht niet also dat se hoer guet mitter vervestinghe verliesen moghen, ten si dat se in des rikes achte ghebracht werden. Hebben hem des graven onderrechters in der vervestinghe ghebracht ende tughense dat selve voor den grave, so coomt die misdader in des graven vervestinghe.
En dat is teghen den dullen luden, die daer segghen een man die hier in desen gherichte vervestet is, die is overal ende in allen landen ende gherechten vervestet. Waer dat dan also, wat behoefde men dan des dat hier staet. Ic rade di dattu niement in den gherechte en laetste verwinnen mit eenre vriemder vervestinghe, doestu dat, ic seg di voorwaer du moordste hem.