Wo men enen doeden verwynnen sal. 1) LXXXIV. (I. 64)
Aldus so sal men ooc verwinnen enen doden, die in dieft of in roof of in anderen quaden saken doot gheslaghen is. Mach ooc een man den doden die in aldusdanighen saken ghedodet is 2) mit VII mannen overtughen ende verwinnen, so en derf hi hem niet te campe bieden teghens den doden 3). Biedet hem oec een van des doden maghen, so wie dat hi is, mit campe voor den doden te staen, die verleecht alle tuuch, want si en moghen hem sonder campe niet verwinnen, ten si dat hi vredeloes 4) si, als hier voir ghesproken is. Also verwint men oec denghenen die te campe ghevanghen of ghegruetet is, die ghelovet ende borghe gheset heeft voor dat ghericht 5) te comen ende niet en coomt totter rechter tijt als besceiden was.
Dat recht dat hier staet, dat is gewandelt mit ghemeynen rechten dat die marcgrewe Otte ghegheven heeft, dat is dat men enen misdadighen man aldus sol verwinnen, die ridders self derde, die borghers self vyfte, die buerman self sevende. Also worthet gewilkoert in der merken.
Auteursrecht onbekend