De Saksenspiegel in Nederland

Omme wat saken dat men den richter broke geven moet, van den de nicht en volghet als men dat geruchte screyet. LXIX. (I. 53.)

Wie niet en volghet den gherechte als men dat ropet ¹), ende of een man den anderen te campe vaet ende beclaghet ende hem die man met recht ontgaet, of wie sijn claghe niet en volbrenghet, of wie totten wtghelegheden ghedinghe ofte recht niet en coomt, ende wie den werf versumet ²) als hi met recht gheladen is, ende wie onder ghedinghe of werve yet onredeliken spreect of doet teghen dat recht, of buten des rechters oorlof spreect, of wie ghewonnen scult niet en betaelt binnen den ghedinghe of binnen der tijt die hem van den rechter gheset is, om een yghelic deser saken voirscr. so salmen den rechter broken gheven, ende oec om alle saken daer men een man bothe mede winnet, daer heeft die rechter sijn broken aen ³), doch so ghift men den rechter broken om ⁴) ontucht die men doet binnen ghedinghe of werve, daer men den clagher of denghenen daer men op claghet, gheen bothen voor en gheeft ⁵)

In desen artikel so leert ons her Eycke drierleye saken, dat men eerlic leven sal, dat een mensch syn evenkersten helpt in alre onrechte noet, - dat ander stuck, dat hi ons hier leert dat is redelicheit, - dat derde stuck, is dat men ghehoersaem sal wesen.
En het is waerlic wel moghelic ende redelic, dat hem een mensche redeliken ende deuchdeliken houde voir gherichte, want die rechters sitten daer in Godes stede.