Van vrauwen de kinder dregen na hores mans dode 1). XLIV. (I. 33.)
Een vrouwe die een kint draghet 2) na hoors mans doot ende si hoor baerachtich of vruchtbaer bewijst 3) biden grave hoors doden mans 4) of totten XXXsten daghe, wort dan dat kint levende gheboren ende heeft die vrouwe des tuuch an vier mannen die dat ghehoert 5) hebben ende an twe vrouwen die hoer helpen tot horen arbeide, dat kint behout syn vaders erve, ende sterftet daer na alst gheboren is, het ervet op die moeder 6), indien dat se hem evenboerdich is, ende het breket alle ghedinghe an sijns vaders leen, nadien dattet levede na syns vaders doot. Ende dan so werden die leen des heren ledich 7) ende vri als dat kint bewiset ende besien 8) wort dattet lijfachtich is ende wort oec openbaer ter kerken ghebrocht. Al diegheen die dat saghen of hoorden die moghen des kints lijf een ghetuuch wesen 9).
Hier seltu nu oec weten dat een vrouwe mach een kint draghen X maenden ende twe daghen ende niet langer.
Dit is nu die nutte daer hi den vrouwen dit om gheraden heeft, opdat der moeder dat erve worde na des kints doot. Ende dat kint breect alle ghedinghe an des vaders leen, want dat leen verlenighet die here onder den besceide of sijn man sonder leenerven storve.
Het si een sonderlinghe sake also, dat die papen, moniken ende vrouwen tugen moghen, want si tugen des kints dope.
Auteursrecht onbekend