De Saksenspiegel in Nederland

Van bysscopen ende van abdissen wo recht de beholden. ²) XLIII (I. 26.)

Wort een monic tot biscop of een cloester vrouwe tot abdisse ghecoren, so motense dat ordel hoerre ghewelt ³) ende dat recht hoers goets behouden ende hebben, mer wat waerlic recht is dat en nemen si niet ⁴).

Deze artikel en is wt der previlegien niet, mer het is een artikel der satinghe of settinge keyser Fredric. Ende dese bisscoppen ende abdissen die behouden leenrecht ende gheen lantrecht, want wie een leen heeft die heeft dat van der kercken weghen. Ende aldus so is denghenen ghelijc die een goet mit eenre vrouwen ontfaet. Coomt dan aldusdanighen heren enige clagte toe in den lantrechte, dat moghen si bevelen horen amptman te rechten, maer wat waerlic recht is dat en nemen si niet an. Dat seltu verstaen aen erve te nemen ende aen gherechte.
Dat gheestelike lude ende papen in drien saken moeten antwoerden aen den waerliken gerichten. Die eerste sake is om hoer leen, die ander sake is om diette of men die berechten sal, die derte sake is ofse te voren gheclaget hebben in waerliken gherichte ende si dan weder beclaget worden.