De Saksenspiegel in Nederland

Van denselven. CCCXLI. (76 § 5.)

Die man en sel den here noch die here den man dor recht niet ontsegghen, dan hi selve hem selven ²), ende daerna sel die ene den anderen niet scaden binnen enen daghe ende eenre nachte. Biddet die man gheleides sinen heren tot hem ende van hem te comene, so wanneer hem die man ontsegghen wil, dat sal hi hem gheven. ³) Weygheret hys hem met onrechte, so moet hem die man wel ontsegghen tot sinen naesten huse, sodat dieghene horen die daer binnen syn ⁴) of hi sal hem ontsegghen daer die vorsten ende die heren van dien lande ghedinghet hebben ⁵), ende sal laten dien here syn goet an dier selver stat. Des ontsegghens sel die man tuuch hebben an tween des heren mannen of hys bederf ⁶), ende ne sal dien here niet scaden binnen ses weken, dat selve doe die here of sine manne thuus ontseghet. ⁷) Wils oec die man missaken, dat hi sinen here ontseghet hebbe aldus, des moet die man bet onsculdich werden⁸) dan hem die here des vertughen moete, hine hebbe hem ontseghet in sine ieghenwoerde, ende of die here dan syn goet verliet, daer hi te ieghenworden was.