De Saksenspiegel in Nederland

Van leen dat men ontfaet van enen onrechten here. CCXXVII. (14 § 2.)

Seghet een man goet van enen anderen here ⁵) in syns heren ieghenwoerde van dien hyt hevet, ende hevet des die heer ghetuuch synre manne, an dien goede ne hevet die man niet rechtes meer, die ghene here ne behoudet van dien hyt toeseghet.⁶) Daeromme ne sal nieman sines lenes heren of were benomen voer den overen here, die wile hys mit leenrechte weygheren mach⁷), want die man is niet sculdich om syns heren goet den oversten here te antwordene, dat hi in sinen weren hevet, alsi hi oec syn man. Mach oec die overhere ghetughen dat syn man hem dat goet opghelaten hebbe of hem mit rechte verdeelt si ⁸), die ghene die die were daer an hevet, moet dat voerstaen ende hem volghen an den oversten here.