De Saksenspiegel in Nederland

Van ioden recht ende ander dinc. CXLV. (III. 7.)

Die iode ne moet kerstines mannes ghewere niet syn, hine wil antworden an ¹) kerstines mannes stat.²) Slaet die iode enen kerstinen man of doet hi ongherechte³), daer hi mede begrepen wert, men rechtet over hem als over enen kerstine man. Slaet oec die kerstine man enen iode, men rechtet over hem om des coninghes banne ⁴) ende vrede, dien hi an hem ghebroken hevet. Desen vrede verwerf eens Josephus weder⁵) den coninc Vespasiaen, doe si sinen sone Tytus ghesont makede van der jychte ⁶). Coft ⁷) die iode of neemt hi te wedde kelke of boeke of gherfsel⁸) daer hi ne gheene ghewere of ne heeft, vintmen binnen synre weren, men rechte over hem als over enen dief. So wat die iode coft anders dinghes onverholen bi daghes lichte ende niet in beslotenen huus, mach hi dat selve mit hem derden ghetughen, hi behout sinen penninghe daer an, die hi daer omme gaf of daer op dede, mit sinen ede al ist oec verstolen, berst hem an dien tughe ⁹) hi verliest sine penninghe.