De Saksenspiegel in Nederland

Van claghen ende van anderen zaken. CXXXIIII. (II. 64.)

Wyf of maghede, die noot voer gherechte claghen ²), die sellen claghen mit gheruchte dor die hanthaften daet die si daer bewisen willen ende doer die noot. Die oec mit diefte of mit rove ghevanghen voer gherechte bringhet ³) die sellen claghen mit gheruchte dor die hanthaften daet die daer scynbaer is. Die oec berovet is ende weet waer syn roef ghevoeret is, wil hi dat hem die rechter volghe daer henen ⁴), hi moeten mit gheruchte daer henen laden ende claghen mit gheruchte dor die hanthafte daet die hi daer bewisen wil. So waer ne ghene hanthafte daet ne is daer moet men sonder gheruchte claghen of mens sonder scaden bliven wil. Negeen kint ne mach binnen sinen iaren niet doen dat syn lyf mede verwerke. ⁵) Slaettet of belemmet enen man, syn mombaer selt beteren mit des gheens weerghelt, of op hem volbrocht wert. So welken scaden et doet die sal hi ghelden na synre weerde. Slaet oec een man een kint of roeft hyt of slaet hyt mit besemen ⁶) dor sine misdaet, hi blives sonder wandel dar hyt gheweren ⁷) op den heylighen, dat hyt dor anders ne ghene zake gheslaghen en hebbe dan dor sine misdaet.