De Saksenspiegel in Nederland

Van dootslaghe. XCII. (II. 14.)

Slaet een man den anderen doet ende en derre niet ²) bi hem bliven dat hine voer gherecht bringhe ende over hem claghe voer syns leves anxt ³), coemt hi sonder den doden voer gherechte ende becant hys, eer men over hem claghe, ende biet hi hem daeromme te rechte, men sal hem sinen hals niet verdelen ⁴). Dien rechter salmen verdelen op hem dat hoechste wedde der penninghe die men hem pleghet ⁵) te gheweddene ende den maghen hore wederghelt te nemene ten naesten dinghe ende tot den anderen ende tot den derden. Ne comen si dan niet vore hi sal daer mede besitten, want syt hem mit claghen of ghewinnen. Ende men sal hem verde werken. Om dien man en mach hem nieman an sinen hals spreken daer hi hem te rechte omme gheboden hevet, eer men op hem claghede ⁶. Bringhet men oec den doden voer ⁷) gherechte ende claghet men op hem, hi moet antworden om sinen hals of hi moet den doden bereden ⁸).