De Saksenspiegel in Nederland

Van vier nootzaken. LXXXII. (II. 7.)

Vier saken syn die rechte nootheten ⁵): vanghenisse ende siecte, Goods dienst buten lande ende des rikes dienst ⁶). So welc deser zaken den man hyndert ⁷) dat hi te dinghe niet en coemt, wort si betuughet ⁸) alse recht is van enen bode wie hi si, hi blyft des sonder scade ende wint dach ⁹) ant naeste dinc, als hi van der rechter noot ledich wert. So wie onrechte claghet op enen die daer ieghenwoerdich niet en is, coemt hi dan vore ende claghet dieghene op hem niet, hi moet den rechter wedden ende denghenen boeten, oec deelt men denghenen der claghe ledich ¹⁰) volvordert ¹¹) hi oec sine claghe al ontgaet hi hem mit rechte, hine lidet daer ne ghene scade omme ¹²). So wie begint oec te antwordene ende wert hem een dincdach gheleghet mit ordele, ne coemt hi niet vore hi is inder claghe verwonnen. Die rechter sal oec borghen hebben van den claghere ende van denghenen daer die claghe op gaet, dat si te rechte voer comen, si sellen oec hores rechtes hem op dat gherechte verzien ¹³).