Die rechter sal oec gheven enen scilt ende een zweert den ghenen die den man sculdighet. Campes mach oec een man sinen maghen verweren 1) of si beide maghe syn, opdat hi mit hem sevenden zwere 2) op den heilighen, dat si also na maghe syn dat si mit rechte te zamen niet vechten en zellen. Die rechter sal twee boden gheven hore yewelic die daer vechten sellen, die dat sien dat mense gherwe 3) na rechter ghewoente. Het ledheren ende linnen 4) dinc moghen si aen doen also vele als si willen, hovet ende voete syn hem bloot 5). Ende an den handen blote dune hantscoen te hebben. Een bloot zweert inder hant ende een ommeghegort of twee, dat staet an horen core. Enen sinen wolten 6) scilt inder ander hant, daer niet dan houd ende leder an en si sonder die bokel, die moet wel yseren syn. Enen roc sonder ermelyn 7) boven die ghere 8). Vrede sal men drie werve 9) bieden biden halse om dat hem nieman en hyndere 10) an horen campe. Hore yewelic sal die rechtere enen man gheven die sinen boem draghet, die en sal hem niet hynderen, dan of hore een valt of ghewont wert of des bomes biddet, dat hi den bome dan ondersteke, dat selve en moet hore ghene niet doen hine hebs orlof 11) van den rechter, nadien dat dien werve gheboden is vrede. so sullen 12) si des werves te rechte gheren 13) ende des sel die rechter orloven. Ort yseren 14) van der zweerde sceyden sellen si ofbreken, sine hebbens orlof van den rechtere.
Auteursrecht onbekend