De Revisor. Jaargang 12

[p. 15]

Elisabeth Eybers

Variant

Liefde kan ook registerloos bestaan,
slytasievry, vryblyvend, dwingender
dan plegtighede wat 'n tweetal paar.
En hoeveel tyd en arbeid kan bespaar
word as jy maar aan iemand hoef te dink
om 'n groot warmtegolf te ondergaan.
Werk suinig daarmee soos met alles wat
onmeetbaar is. Ek draai 'n knop, daar klink
'n uitspraak oor computers waaruit blyk
die oneindige is buite hul bereik.

Dit was

gevaarlik maar nie treurig nie,
skermutseling met die eindigheid,
die wakkerword in 'n wit bed
voortsetting van voorlopigheid...

'n Helder onverskilligheid
wat die hersteltyd vergesel
verskerp my sintuie en bring
vroeër gebruike weer in tel

soos my bemoeienis met 'n man
wat ek noukeuriger omdroom
terwyl ek hom tog minder sien:
die onbeskaamdheid en die skroom.

Ek hoop

nie sonder 'n titseltjie vrees
(só eenvoudig sal dit nie wees)
om die hele kasarm te ontsluip,
ingekrimp in myself, weggekruip
met my kop in my elmboogbog,
waaghalsig soos elke nag
op 'n grillige drometog
maar nog verder, verdoolder nog:
onvindbaar die volgende dag.