Reis van Jan van Mandeville

Van een alte ryken man die nochtans gheen prince en is ende anders.

Van desen lande int weder\keren

[fol. 158ra]

door des groten cans lant in x dachuaerden na staet een ander groot ende goet eylant ende conincrike, daer een rijc coninc in is ende machtich. Ende onder alle dander liede van desen eylande so is een rijc man, die noch prinche, noch amirael, noch hertoghe noch graue en is, mer hi heeft onder hem harde vele liede, die haer lant van hem houden. Dese man heeft wel te renten jaerlix ccc^m. kemele gheladen mit corne ende mit rise ende hi leedt een edel leuen na die costume van daer, want hi heeft .l. joncfrouwen ende maechden, die hem altoos ten eten dienen ende tsinen slaep gaen ende die hem doen al dat hi wil. Ende als hi ter tafelen gheseten is, bringhen si hem sijn spise telken vijf gherechten te gader ende si brenghen dese gherechten al singhende ende dan snidense voer hem syn spyse ende stekense hem inden mont.

[fol. 158rb]

Want hi en handelt noch en doet niet mitten handen, dan hise voir hem leidt op die tafele, want hi heeft so langhe nagle, dat hi niet en soude connen ghehouden noch ghenemen, want dat is daer grote edelheit den mannen, dat si langhe nagele hebben ende sise laten wassen also langhe, alsi wassen moghen. Ende daer is menich man int lant, die haer nagle so lanc laten wassen, datse al om haer hant gaen, dat dunct hem een herde grote edelheit. Ende die edelheit vanden wiuen vanden lande is, dat si cleyne voete hebben. Ende daer om also saen alsi gheboren sijn, men bint hem die voete so vast, datsi niet half en wassen so seer alsi zouden. Ende dese joncfrouwen

[fol. 158va]

singhen liedekine die wile dat hi et. Ende als hi niet meer en et van desen gherechten, so bringhen si hem ander vijf gherechten ende zinghen, als zi eerstweruen daden. Ende aldus doen si tote dat hi al vol gheten heeft ende aldus doen si alle daghe. In deser manieren so leet hi sijn leuen, ghelike dat sine voorders ooc ghedaen hebben ende aldus sullen si doen, die na hem comen sullen zonder enich scoon feyt van wapenen te doen, mar si leuen aldus altoos na haerre ghenoechten als een verken, dat men mest. Dese rike man heeft een rikelijc pallaes, daer hi woont ende daer die

[fol. 158vb]

muere of heuet wel ij milen ommegaens. Ende daer binnen staen vele scoonre boomgaerden ende al tpaueysel van sijnre cameren ende van sijnre zalen is van goude ende van suluere. Ende te middeweghen van een van desen boomgaerden staet een cleyn berchskijn, daer een scoon preyeel in staet. Ende in die prieel staet een alte sconen kercskijn mit toornen ende mit berbecanen al van goude. Ende in dit kercskijn gaet hi dickewile sitten om goede lucht te hebben ende hem te vermaken. Ende om gene dinc en is dit kercskijn ghemaket dan allene om sine ghenoechte hebben. Van desen lande trect men achterwaert ten lande vanden groten can,

[fol. 159ra]

daer jc v hier of gheseit hebbe.