Reis van Jan van Mandeville

Van een conincryck gheheten riboth ende anders.

Van desen eylande coemtmen int weder\keren tot enen anderen eylande of conincryc, datmen heytet riboth, dat oec onder den groten can is ende is oec een oueruloedich lant van coern ende van wyn ende van anderen dinghen. Ende dese luden en hebben gheen husen, mer si wonen ende ligghen in tenten, ghemaect van swarten vilte al tlant doer. Jn dit lant van riboth heeft haer coninc ene scone stat ende het is een coninclike grote stat ende is al mit witten ende zwarten stenen bemuert ende alle die straten syn mit sulcke

[fol. 157ra]

stenen ghepaueit. Jn dese stat en is niement so coene, die bloet soude dorren storten noch van menschen noch van beesten om die waerdicheit van haren afgod, die si aenbeden. Jn dese stat woont die paeus van haren gheloue, die si heten lebassi. Dese lebassi gheeft alle beneficien, prouende ende ander dinghen, die den afgoden toe behoren. Ende alle die ghene, die yet houden van haerre kerken, liede van ordenen na haerre wet ende ander, sijn hem onderdanich, also die liede vander heyligher kerken sijn hier den paeus. Jn dit eylant van riboth hebben si een costvme, alse die vader van yemende sterft ende die sone wil sinen vader grote eer doen, hi ombiet alle sine vrienden ende maghen

[fol. 157rb]

ende liede van ordenen ende papen ende vele minnestreers. Ende dan doet hi sijns vaders lichame draghen op enen berch mit groter feesten ende blijsscepen. Ende die dan is die grootste prelaet slaet hem sijn hooft of ende leechtet in een grote gulden platele ende gheuet den sone ende die sone ende die andre draghent al singhende thuus ende segghen vele bedinghe. Ende daer na die papen ende die gheordende liede houwen dien lichaem in stucken, segghende haer bedinghen. Ende die voglen van dien lande, die sulke costume wel gheleert hebben van langhen tiden, comen daer bouen vlieghende

[fol. 157va]

ende die papen werpen hem stucken toe van dien vleessche ende si draghent niet verre, si en etent alle ende daer na ghelike dat die papen hier in dit lant singhen voor die doden: subuenite sancti dei et cetera, also singhen die papen daer mit luder ende mit hogher stemmen in haerre spraken: besiet, hoe goeden mensche dit was, die die ynghelen comen halen ende draghen int paradijs. Ende dan dunct den zone, dat hi harde zeere gheeert is, als die voghelen sinen vader eten. Ende die ghene daer meest voghelen om comen, die is meest gheeert. Ende daer na die sone leidt sine vrienden ende sijn maghe te sijnre woninghe waert

[fol. 157vb]

ende doet hem grote feeste. Ende die vriende ende die maghe vertrecken, hoe die voghelen quamen hier v, hier x, ghinder xx ende glorieren ende beroemen hem daer of. Ende alsi in huus vergadert sijn, die sone doet sijn vader hooft zieden ende gheuet een yghelijc van sinen zonderlinghen vrienden vanden vleessche tetene tenen entelmoese. Ende vander hersse bac maect hi enen nap, daer hi wt drinct ende die vriende ooc met groter deuocien in ghedinckenisse des heylichs mans, die die voghelen gheten hebben. Ende desen nap hoedt hi waerdeliken ende drincter wt alle sijn leuedaghe lanc om die ghedinckenisse sijns vaders.