Hoe dat paep jans lant voet teghen voet leyt teghens
enghelant.
Van desen eylande ende van paep jans landen, daer ic voer of
ghesproken hebbe, die onder ons syn ende vanden anderen landen, die noch vorder
syn, dyese woude veruolghen om al die werelt om te gaen, die de gracie van gode
hadde, dat hy den rechten wech houden mochte, hy mocht den rechten wech
wederkeren tot sinen lande, daer hi wt ghescheyden was recht voertgaende tot hi
alle die werelt om ghegaen hadde. Mer luttel luden proeuen dese wech, om datmen
daer alte veel tyts ouer soude doen ende om al die vreesen, die in desen wegen
syn ende om menigherhande veruaerlics volcs wil, diemen in menighen eylanden
vynt ende om der zee wille, die tot menigher stat vreselyc is te reysen ende
oec om des verdolens wille. Ende daer om keertmen weder van desen lande doer
ander eylanden altoes gaende op die zyde van paep jans lant, so dat men int
wederkeren coemt in een stat, die heet cayssam ende leit in een eylant, welck
wel .lx. dachuaerden lanc is ende wel vyftich dachuaerden breet of meer ende
dit is dat beste eylant ende conincryck wt genomen cathay. Ende waert dat die
coepluden dit lant also wel hantierden, als si cathay doen, het soude veel
beter syn dan cathay. Dyt lant is also wel bewoent ende vol volcke. Als men wt
eenre stat gaet, men siet staphans een ander stat voerwaert, so waermen oec
gaen wil. Jn dit eylant is harde veel goets van leuinghe ende van allen specien
ende cruden ende daer syn oeck grote bosschen van castanien. Die coninck van
desen eylande is harde machtich, nochtans hout hy syn lant vanden groten can
ende is hem onderdanich, want het is een vanden .xij. prouincien, die de grote
can onder hem heeft behaluen syns selfs lant.
Auteursrechtelijk beschermd