Reis van Jan van Mandeville

Van die wildernisse, daer dye bomen der sonnen ende der manen staen.

Ende van deser riuieren sijn xv dachuaerde verre gaende door die wildernisse, op datmenre mochte gaen, want jc en wasser niet, mar het was ons gheseit vanden lieden van dien lande, dat binnen deser wildernissen sijn die bome der zonnen ende der manen, die teghen den coninc alexander spraken ende onderscieden ende seiden hem sine doot. Ende men seit, dat die priesteren ende die ander liede, die dese bome hoeden ende van haren vruchte of froyte eten ende vander balsemen ooc die

[fol. 154ra]

daer wast, si leuen wel iiij^c jaer of v^c ouermids die cracht vander vrucht ende vander balsemen, want men seit, dat herde vele balsemen wast daer ende niewers el dan daer ende te babylonien, als ic v hier voren seyde. Nv suldi weten, dat wi alte ghaerne te desen bome hadden ghegaen hadden wi ghemoghen, mar jc wane, dat c^m. menschen en souden daer niet comen behoudenliken door die wildernisse allene om den groten hoop der wilder beesten, die daer sijn ende der groter drake ende serpenten, die doden ende verslinden al dat si vercrighen moghen. Jn dit lant zijn witte olifanten sonder ghetal ende eenhoorne ende ander beesten herde veruaerliken. Jn pape jans lande zijn vele deser eylanden ende zijn vele deser wonderlicheden, dat alte lanc ware te vertrecken ende vele rijc\heden

[fol. 154rb]

ende ghesteente. Jc wane wel, dat ghi hebt horen segghen ende dat ghijt ooc weet, waer omme dat dese keyser het pape jan, mar jc sal v noch segghen waer om, omder gheenre willen, dies niet en weten. Bij tiden die leden sijn was een keyser, dat een herde groot ende vroom prinche was ende hadde in sijn gheselscap kerstene ridders, also dat noch doet die noch keiser is, so dat hem eens herde zere luste te zien den dienst gods der kerstene ende doir ghinc kerstenheit ouer die zee tote turkien, armenien, surien, jherosolimam, arabien, halappe ende tote int lant van egypten, so dat dese here eens quam ghereden mit luttel gheselscap te eenre

[fol. 154va]

kerken van egypten op enen saterdach na sinxen, dat die bisscop van alexandrien oordene maecte ende hi sach ende hoorde den dienst gods ende sach ordene maken. Doe vraechde hi, wat lieden dat dat sijn zouden, die de prelaet voor hem hadde, daer hi so vele dienst ouer ghedaen hadde. Ende een van sinen riddern antwoorde hem staphans, dat het papen sijn zouden. Ende hi seide doe staphants, dat hi niet meer coninc sijn en woude noch keyser, mar pape ende woude ooc heten ende den name hebben des gheens, die daer eerstwerf vut quam van dien nuwen papen, die welke jan hiet, so dat si hier omme oyt sint altoos gheheten sijn van dien lande ooc

[fol. 154vb]

pape jan. Jn sijn lant zijn ooc herde vele kerstene van goeden gheloue ende van goeden betrouwene ende si hebben ghemeenlijc enen cappellaen die hem misse singhet ende maken tsacrament van brode, als die van grieken. Mer si en segghen niet so vele dincs ende bedinghen, alsmen in dit lant doet ende pleghet. Want si en segghen niet meer dan hem sinte thomaes leerde ende also die ander apostelen plaghen te doene, segghende allene haer pater noster ende die vyf woerden, daer men tlichaem ons heren mede consacreert, mer wi hebben vele addicien, dat sijn toeualle, die die paeuse daer toe gheset hebben, daer si niet of en weten.