Reis van Jan van Mandeville

Van een groot eylant ende coninckryck gheheten taprobane.

Ende voort ten oosten waert van pape jans lande staet een groet eylant ende een groot conincrike, datmen heet

[fol. 155ra]

tabrobane, dat een herde edel vruchtbaer lant is, ende die coninc van desen lande is herde rike. Ende altoos als die coninc doot is, so kiesen si enen andren. Nochtan is hi ende alle sijn lant onderdanich den pape jan. In dit lant sijn twee wintere ende twe somere ende men oechstet coren twee weruen tsiaers. Ende in allen tiden vanden jare sijn daer die boomgaerde groene ende bloeyen. Daer wonen in goede liede ende verstandeghe ende vele kerstene onder hem, die so herde rike sijn, dat si niet en weten, hoe vele dat si hebben. Bi ouden tiden die leden zijn, als men plach te varen van pape jans lant in dit eylant mit ouden scepen, men placher wel toe te doene xxiij dachuaerden of meer, mer mitten scepen, diemen daer nv maect, so vaertment wel binnen vij daghen ende men siet den gront

[fol. 155rb]

vanden watere te menigher stat, want het en is niet diep.