Reis van Jan van Mandeville

Hoe die keyser sijn munt van leder is ende verteren mach also veel als hy wil.

[fol. 122vb]

Die keyser mach also vele verteren als hi wel zonder ghetal, want hi en verdoet noch gout noch suluer, noch hi en maect en ghene munte anders dan van gheprenten leder ofte van papiere. Ende dan dier munte is die een waerder dan die ander, na dien dat teken is dat daer op staet. Ende alse dese munte also langhe ghelopen heeft ende ghegaen, dat die printe al beghint te vergaen, dan draghet mense tot des keysers tresoriere ende hi gheeft hem nuwe munte om die oude. Ende dese munte gaet door al sijn lant ende in al sijn prouincien, want daer en maken si gheen munte van goude of van siluer. Ende daer om mach hij

[fol. 123ra]

ghenoech verteren. Ende vanden goude ende van den suluere, datmen in sijn lant brinct, doet hi altoos zijn pallaes maken ende al ander dinghen, die hem ghenoeghen. Ende in een vanden pylaernen van sijnre cameren, die van goude is, staet een robijn carbonkel, die een voet lanc is, die des nachts alle die camere verlicht ende hi en is niet gherecht root, mer hi ghelijct enen brunen amastite. Daer in staet noch menich ander robijn, mer die is die dierbaerste ende die meeste. Die keyser woont in den somer in een stat diemen heet sadus ende staet noorden waert, want daer ist redelike cout. Ende in dien winter so woont hi in die stat camahalech, daert herde

[fol. 123rb]

heet is. Mar daer hi meest ende ghemeenlijc woont dat is te cathay, dat daer bi is in een herde goet lant ende wel ghetempert, na dien dat die lande daer omtrent sijn, mer in dit lant waert alte heet.