Reis van Jan van Mandeville

Om weder te keren in dese syde vanden lande van galileen.

Na dien dat jc verclaert hebbe ende ghe\toont

[fol. 60vb]

somighe maniere vanden volke van ouer zee, so willic v nv segghen ende tonen den wech weder te keren in dese zide. Die vanden lande van galylea, daer jc hier voren of hebbe ghesproken, wil weder keren in die zide, hi comt door damas, dat een herde scoen stat es ende vol van allen comanscapen ende es vier dachuaerde verre vander zee ende es viue dachuaerde van jherusalem. Ende men brencter van alle lande comanscape ende penincwaerde op paerde, op mulen, op kemelen, op dromedarisen ende op ander beesten ende ooc ter zee van jnden, van persen, van caldeen, van armenien die grote ende van menighen anderen conincrike. Dese stat maecte

[fol. 61ra]

elyzeus damasco, doen hi mit abraham woonde ende was sijn dispenseerdere ende wtgheuere, eer ysaac gheboren wart, die ghebernt waende sijn van sijnen vader abraham, die dese stat hiet damas ende in die plaetse, daer damas was ghemaect, daer doode caym sinen broeder abel. Ende bi damas es die berch van sier. Jn dese stat staen herde vele fonteyne. Ende binnen ende buten dese stat staen vele boomgaerde draghende menigherande vruchten ende froyt. Men mach ghene ander stat deser stat gheliken van scone boomgaerden ende van scoonre verlichtinghe. Dese stat van damas es grote ende wel gheuolct ende wel mit dubblen muren ghemuert. Ende daer wonen herde goede meesters van medicine om den

[fol. 61rb]

lichame te behoudene in ghesontheden. Ende sinte pauwels was daer een van dien eer hi bekeert was, mer daer na wart hi meester van medicine der zielen ende sinte lucas was sijn jonghere om medicine te leren ende vele andre, want sinte pauwels hilter scole van medicine. Ende bi damas wart hi bekeert ende na dien dat hi bekeert was, so woonde hi in die stat drie daghe lanc zonder zien ende zonder eten ende drincken ende binnen desen drien daghen wart hi op ghetrucken in den hemel niet lichamelijc mer gheestelijc, daer hi vele vander heimelicheyt gods sach. Bi damas es die casteel darkes, die herde starc

[fol. 61va]

was. Van damas men coomt door onser vrouwen van sardenach, dat v milen in dese zide damas es ende es op een rootse gheleghen ende is een herde scoen stede ende het scijnt, dat een casteel si. Ende daer zijn redelike scoon kerken, daer kersteijn moniken ende nonnen wonen ende hebben daer herde goeden wijn ende in die kerke achter den groter outaer staet een tafle van houte, daer een beelt van onser vrouwen plach aen ghescreuen te staen met verwen, dat mit miraclen van gode verwandelde in vleessche, mar nv sietmen herde luttel van desen beelde. Mer bider gracien gods so druupt vter tafelen altoos olie

[fol. 61vb]

recht oft olie van oliuen wair. Ende onder dese tafle so staet ghebonden mit yseren bande een vat van merbere omme die olie tontfane, die daer vte druupt ende van desere olien gheeft men den pelegrinen die daer comen. Want dese olie comt bi miraclen van gode ende ganst van vele ziecheden ende men seit, alsmen dese olie wel cuusschelijc huedt, dat si ten ende van vij jaren vleesch ende bloet wart. Van sardenach comtmen doort dal van bokar, dat een herde scoon dal es tusschen tgheberchte. Ende daer zijn scoon riuieren ende beemte ende ander dinc te beesten behoef. Ende men gaet door die berghe van libaen, die dueren van der groter armenien

[fol. 62ra]

noorden waert toten dal, dat zuden waert es aent beghinsel vanden lande van ghelooften, also jc v voor hebbe gheseit. Dese berghe sijn herde vruchtbarich ende daer sijn vele scoonre fonteynen ende ceder bome ende cypres boom ende vele andre manieren van bomen ende daer in staen vele scoonre steden, die wel gheuolct sijn. Aen tbeghinsel van desen berghe tusschen die stat van dorke ende die stat van basen loopt een riuiere, die men heet sabbaitaire, om dat si des saterdaghes seer loopt ende die vj. ander daghe vander weken loopt si luttel ofte niet. Ende tusschen dese berghe lopet een ander riuiere, die des nachts js herde hart veruorsen ende

[fol. 62rb]

des daghes en wartmen gheens ys ghewaere. Ende int omme keren van desen weghe door dese berghe staet enen groten hoghen berch, diemen heet dien groten berch, daer op staet een herde scoon stat, die men heet tripole. Jn dese stat wonen herde vele goeder kerstine van onsen gheloue. Vandaer gaetmen te beruth, daer sinte jorijs den draec door stac dat is een scoen stat ende daer es een groot starc casteel, also jc hier voren hebbe gheseit ende es iij dachuaerde in des zide sardenach ende xvj milen na der stat van sydon. Daer lijdmen op die zee die wil om weder te keren te cypre waert ofte men coomt te lande toter hauene van sydon ofte van thir

[fol. 62va]

ende van daer coomtmen in cypren in luttel tijts ofte men gaet vander hauene van thir rechte sonder in cipre te comene, want men cromt hem al daer tot enigher ander hauene in griken ende dan so coomtmen weder in det zide, ghelijc jc v voorseit hebbe.