Reis van Jan van Mandeville

Vander kercken des heylighen graefs.

Jn dese kerke vanden heyligen graue noorden waert is die stat, daer onse here ghevanghen wart, want hi was te menigher stat in gheuanghenisse gheleecht. Ende al daer es een deel vander ketenen, daermede dat hi ghebonden was. Ende daer openbaerde hem onse here eerstwerf marien magdalenen na sine opuerstandenisse, doe zi waende, dat een hofman gheweest hadde. Jn deser kerken plaghen te sijn canonike regheliere van sinte augustijns oordene ende hadden een prioor, mer die patriarke was hoer ouerste. Buten der dore van deser kerken met xviij trappen opclimmende seyde onse here tot zijnre moeder: siet daer dinen zone ende toonde haer sinte janne ewangelisten. Ende daerna seide hi tot sinte ian: sich hier dijnre moeder. Ende dese selue woorde sprac hi anden cruce. Ende

[fol. 40rb]

op dese trappen clam onse here, doe hi dat cruce op sinen scouderen droech ende onder desen graet ofte trappen staet een cappelle. Jn dese cappelle doen misse priesters van indien niet na onse maniere, mar na die hare, mar doch maken si dat sacrament van brode seggende die vijf woorden, die daer toe horen ende segghen ooc den pater noster ende ooc mede zomighe andere bedinghe, want si en weten niet van vele ordinancien, die die paeuse ghemaect hebben, mar si doen harde deuotelijc misse. Ende herde na daer bi es die stat, daer onse here ruste, doen hi moede was van sinen cruce te draghen. Ende weet, dat die stat van jherusalem op die zide van deser kerken vanden heylighen graue es cranckelike ghemaect ende niet so starc, als si elwaer is, omt grote dal, dat is om dese kerke

[fol. 40va]

ende om die stat. Ten oosten waert ane die mure vander stat ist dal van josaphat, recht oft waer een grote brede grachte. Ende bouen dat dal van josaphat buten der stat staet sinte steuens kerke, daer hi ghesteynt wart. Ende daer bi es die vergulden poorte, die niet op ghedaen en mochte sijn. Doer dese porte quam in die stat van jherusalem onse here sittende op een eselinne opten palmesondach. Ende dese poorte dede haer op ieghen hem, als hi woude ten tempel gaen. Ende noch sijn daer die voetstappen vander eselinne ende men bekennesse wel te drien steden op die trappen, die daer sijn van wel harden stenen. Ende voor dese kerke vanden heylighen graue te zuden waert in ccc.

[fol. 40vb]

vademen na staet dat grote hospitael ofte gasthuus van sinte janne, vanden welken die hospitaliere haer fundament maken. Ende binnen den palayse der sicken van desen gasthuse so staen vj^xx ende iiij steynen pylaeren ende in die muer van dien gasthuuse liiij pylaernen. Ende buten dit gasthuus te gaen ten oosten waert daer staet een herde scone kerke, die men heet tonser vrouwen der grotere. Ende dan is daer een ander kerke herde na, die men heet tonser vrouwen der latijnscher. Daer waren maria magdalena ende maria cleophe, die hem trocken biden hare als verwoede wiue van rouwen, doemen onse here ghecruust hadde ende hi ghestoruen was.