Reis van Jan van Mandeville

Vander stat ran cayr daer dyc balsam wast.

Die stat van cayr, daer die soudaen meest woont, is meerre dan babyloninen, die daer bi staet ende is gheleghen bouen babylonien ten wildernisse waert een luttel bouen der riuieren van nil voirseit. Het sijn twee egypten, die hoghe, die te ethyopien waert staet, ende die mindere, die in arabien is. Ende in egypten so is tlant van ramasse ende tlant van yessem. Egypten is een sterc lant ende daer sijn vele qua\de

[fol. 23rb]

hauenen omme die grote rootsen, die daer in die zee sijn, die quaet te lidene sijn. Jn egypten ten oosten waert is die rode zee, die duert totter stat van cascon. Ende ten westen waert is tlant van libien. dat een herde droghe lant is ende ondrachtich, want het is daer herde heet, ende dat lant is gheheten such. Ende ten zuden waert is tlant van ethyopien. Ende noorden waert is een wildernisse, die duert tote syrien. Ende aldus is tlant sterc op allen ziden. Tlant van egypten is wel xv dachuaerde lanc ende ooc tweewerven meer wildernissen ende en is mar drie dachvarden breet. Ende tusschen egypten ende nubien sijn wel xij dachvaerden wildernissen.

[fol. 23va]

Ende die liede van nubien sijn kerstene, mer si sijn also swert als enighe haghebesye om die grote hitte vander sonnen, die in dat lant is. Jn egipten sijn v prouincien, die eerste heet men sahic, dander demefre, die derde resich, die in een eylant staet vander riuieren van nil, die vierde alexandre, die vijfte tlant van damietten. Damietten plach te sijn een harde sterc lant ende stat, mer si heeft twee werue ghewonnen gheweest vanden kerstenen. Ende daer omme so worpen die sarrasinen namaels die muren vander stat ter neder ende alle die stercheden, die daer in waren ende maecten een ander stat vorder vander zee, die si heeten die nuwe damietten, so dat niement en woont in die oude damiette. Daer is een

[fol. 23vb]

vanden hauenen van egypten, dander is te alexanderien, dat een starke stat is, mer si en hebben en gheen goet drinc water, het en come vanden conduten vander riuieren van nil, die binnen haren cisternen sijn. Ende die hem name twater vanden conduten voirseit, si en souden niet moghen duren. In egipten sijn luttel stercten ende fortressen ofte castele om dat tlant van hem seluen sterc is.