Reinaerts historie (Reinaert II)

(1998)–Anoniem Reinaerts historie (Reinaert II)– rechtenstatus


Reinaerts historie, 6001-7000 Ende op sijn lijff dat nyement en liete Hy bleef voort bi den coninck Ende was gelooft van alle dinck Altoos most hi hem naeste gaen 6005[regelnummer] Ende op sijn hooft was gestaen Een scoon fiolen rosen crans Die hem den coninc myt eren gans Gaff ende deedse hem myt eren dragen Nv is dit alte samen ouer geslagen 6010[regelnummer] Ende men verget al ouder duecht Die gierige scalken werden verhuecht En die wijsheit set men achter Des hebben die heren groot lachter Ende dalen so lanc so meer 6015[regelnummer] Want als een dorper gier wert heer
[Folio 93v]
Ende bouen synen bueren crijcht macht So en weet selue niet wie hi slacht Hy en kent niet waen hi comen sy Ende om nyement liden en droeft hy 6020[regelnummer] Hy en hoort oec nyements bede Dair en volcht die gifte mede Al sijn menich dats brengt hier Och hoe mennich dorper ghier Sijn nv te houe biden heeren 6025[regelnummer] Die zeer smeken ende smeren Mer mochten sy haers heren leuen Behouden myt een oor te geuen Si lieten steruen eer zijt gauen Si slachten den wolf die node lauen 6030[regelnummer] Den coninc sijnre leuer woude Noch had ic lieuer eer dat ic soude Die coninc steruen ende sijn goede wijff Dat hondert wolf verlorent tlijff Ende het wair oec mynre scade 6035[regelnummer] Want wat coomt van quaden zade Sijns dancks doet hi selden duecht Heer coninc dit sciede in uwer Juecht Dat uwen vader dat was gedaen Dair bi ist licht v ontgaen 6040[regelnummer] Ende oec so hebb ic selue mede Gedaen eer ende huefshede Die doe wel behagede v Al danct di my so luttel nv Mer v en gedencs so ic waen 6045[regelnummer] Dair bi ist noot dat ics vermaen Niet dat ict doe om enich verwijt Want ic bin sculdich tot alre tijt Door v te doen wes ic vermach Jc quam gaende op enen dach
[Folio 94r]
6050[regelnummer] Mitten wolf her ysegrijm Wy hadden geuaen tesamen een swijn Dat beten wi doot voor tlude garren Heer doe quaem dy van verren Wt eenre hagen ons in tgemoet 6055[regelnummer] Ghi gruete ons myt scoonre groet Ende spraect gi twee sijt wellcome Die honger doet my also wee Ende mynen wiue die hier coomt achter Woud di ons deilen ons soud te sachter 6060[regelnummer] Te moede wesen van uwen gewynne Her ysegrim sprac biden kynne Ja so dat men nauwe verstont Mer ic riep myt luder mont Ja wi heer al waert veel meer 6065[regelnummer] Wie wildi dattet deilt nv heer Dat sel dy wolf heer spraect gi doe Des was ysegrym doe wel vroe En deildent als hi was gewoen Die een heelft nam hi tot sijn verdoen 6070[regelnummer] Te vorenwt ende tvierendeel End dat ander deel mijnre vrouwen Doe ghinc hi biten ende knouwen Ende haeste hem dat hijt op at Dat oor mitten naes gat 6075[regelnummer] Ende half die longen gaff hi my Ende al dat ander behielt hy ALdus toonde hi sijn edelheit Eer men eens credo had geseit So had hi sijn deel op als gi selt weten 6080[regelnummer] Nochtan had hi geern meer gegeten Want hi en was noch niet sat Doe baed gi ysegrim noch om wat Mer heer hi en gaff v niet een koot
[Folio 94v]
Doe hief dy op uwen rechteren poot 6085[regelnummer] En sloechten so tusschen sijn oren Dat hem dat fel mochte schoren Vander nasen totten ogen Doe en cond hi niet gedogen Die smerte hi huylde ende bloyde zeer 6090[regelnummer] Ende liep wech myt snelre keer Ende liet sijn deel dair leggen neder Ende brengt ons meer hoe ghijt raemt Ende ziet dat gi v bet meer scaemt Als gi deilt op een ander tijt 6095[regelnummer] Doe seide ic heer gebiet ghijt Jc ga myt hem ic weet wel wat Ghi seit ic liep na dat Mit hem hi carmde zeer ende stan Ende croonde hoe qualic hi dair was an 6100[regelnummer] Mer hi en dorst niet wel clagen So lange liep wi te samen iagen Dat wi een vet calf vengen Ende doe ghijt ons saget brengen Lachde gi ende het behagede v wel 6105[regelnummer] Reynaert sprac gi zijt snel Ter iacht als gijt v wilt onderwijnden Jc zie gi cont wel wat vijnden Gi zijt goet wt geseynt ter noot Dit calf is vet ende groot 6110[regelnummer] Hier moget gi seluer deilre of sijn Jc doet gern seide ic lieue heer mijn Die een helft is v wt te voren Die ander moet uwen wiue toe behoren Pensen leuer dermen ende longen 6115[regelnummer] Die sellen hebben v iongen Dat hooft sel hebben ysegrijm Ende die voeten die sijn mijn
[Folio 95r]
Doe gi dit hoorde waer di vro Reynaert wie leerde v also 6120[regelnummer] Huesschelic deilen doet my verstaen Heer dat heeft dese knaep gedaen Die mitter roder crvnen sit hier Om dat hi hem maecte so fier Huden doe deilde dat swijn 6125[regelnummer] Dus was gelopen isegrijm Dat hi creech scade ende scande mede Mit sijnre onhuesscher gierichede Oec dat men wolff noh huden vijnt Die sonder eet ende verslijnt 6130[regelnummer] Die geen dair hi ouer mach Hem naect mennigen droeuen dach Die die wolue zaden moet Want sy en sparen vleisch noch bloet Al dat sy vijnden nemen sy mede 6135[regelnummer] Wee der landen ende der stede Dair die woluen hebben die ouerhant Sy en sparen vrient noch [vyant] So wat sy crigen dat hem genuecht Dat ende mennigerhande duecht 6140[regelnummer] Heer heb ic voor v gedaen Die ic v wel soude doen verstaen En viel die reden niet te lanck Des gi my segt zeer luttel danck Naden woorden die ic van v hoor 6145[regelnummer] My dunct zaech di al dinc wel door Dat gi wel myt my mocht liden Byn ic die ezel die men sel riden Off dat lamkijn dat men eten moet Wair mijn auentuer goet 6150[regelnummer] Jc soude ander snodel eten Jc plach goet ende quaet te weten
[Folio 95v]
Bet dan sulc ander ende was oec mde Wel gelooft van dat ic dede Jc const voir vrouwen en voor heren 6155[regelnummer] Een saeck in setten ende ordineren Dair macht aenlach ende bet voorsien Wat vanden dingen mocht gescien Dair sulc tien daert nv aen staet Men plach genen wisen nauwen raet 6160[regelnummer] Te sluten. Jc en wass dair by Al heeft dat ongeual nv my Aldus onder tnet geuaen Dat blat dat mocht noch ommeslaen Ende dat rat van auentueren 6165[regelnummer] Mocht my noch oec gebueren Dat mijn recht ende oec mijn woort Gelijc enen anderen soude gaen voort Want ic en eysch geen verdrach Jst datment my betugen mach 6170[regelnummer] Na den recht in enigen broken Jc wil dat aen my sy gewroken Ende seit my yement yet op dat hi Toe mach brengen die set by Nader gewoente vanden houe 6175[regelnummer] Heer conic by uwen oorloue Bidic dat v dit genuege Reynaert gi sprect al te gevuege Vwer talen volch ic al My en is oec niet tot ongeual 6180[regelnummer] Cond wi weten wi kuwaerts leuen nam Anders dan ons bellijn den ram Sijn hooft in die scerp brocht Jc laet v quijt van desen gerocht En ic en wil niet meer op v cronen 6185[regelnummer] Lieue heer god moets v lonen
[Folio 96r]
Seker gi moget oec wel also Sijn doot maect my so onvro Dat my dat hert dunct versieden Och doe sy beide van my scieden 6190[regelnummer] Cuwert ende mijn vrient bellijn Hoe swaer wart dat herte mijn My docht dat ic beswijmde al Jc meen het was tegen dit ongeual Dat my leider was so naer 6195[regelnummer] Alle die meeste hoop die was daer Die reynaerts tael hebben gehoort Van Juwelen ende hoe sy voort Dair op storte sijn gelaet Meenden dat was sonder beraet 6200[regelnummer] En dat hi niet dan wair en sprac Sij claechden seer sijn ongemac Synen scaed ende synen rouwe Die coninc selue ende sijn vrouwe Ontfermden sijnre ionck ende oude 6205[regelnummer] Ende seiden dat hi troosten soude Ende pijnde hem te zueken die iuwele Want hi hadse geprijst so vele Datter hem zeer die syn op stoet Ende om dat hi hem maecte vroet 6210[regelnummer] Dat hise hem beiden had gesant Al quam hem niet in die hant Nochtan hadden sise gern genomen Hadden sy geweten wair aen comen REynaert die wel die meninge verstont 6215[regelnummer] Die weynich goets had in synen gront Sprac god danck v heer ende vrouwe Dat gi my troost in mynen rouwe Jc en sel rusten nach noch dach Noch nyement die ics bidden mach
[Folio 96v]
6220[regelnummer] Jc sel lopen ende iagen Smeken bidden ende vragen Die werelt duer die vier hoeken Al soudic ewelic zoeken Tot dat ic weet wair sy sijn 6225[regelnummer] Ende ic bid v lieue here mijn Off si waren oec tot sulcker stede Dat mijn cracht mijn bede Niet helpen en mocht dat gi my dan Wilt helpen want het gaet v an 6230[regelnummer] Het goet is v ende v toebehoort Te rechten voor rooff offte moort Die leider dair om is gesciet Reynaert des en laet ic niet Wanneer gi weet wair sy sijn 6235[regelnummer] Ende gi begeert die hulpe mijn Die sel v altoos sijn bereit Och heer dats alte wel geseit Cond ic noch ic souts v lonen Nv dunct reynaert sijn zaken zeer sconen 6240[regelnummer] Hy heeft den coninc tot synen wil Die hem viant was openbaer ende stil Hy denct macht hier dus gaen wt Datter toe was goede gruut Na dien gescepen stont te voren 6245[regelnummer] Hy heeft hem allen so veel in doren Luegen geslagen ende doen verstaen Dat hi wel vri waent henen gaen Sonder van yement beroepen sijn So had hi oec mer ysegrijm 6250[regelnummer] Wart toornich ende mysmoedich zeer Hy sprac heer coninc edel heer Si di dus kijnts dat gi gelooft Den losen scalc die v verdooft
[Folio 97r]
Mit gevensder logentael gescal 6255[regelnummer] Dat heeft my wonder al Jc soud hem tru gelouen spade Hy is van moort ende van verrade Door togen ende men houtet al voir spel Dat sal ic hem bewisen wel 6260[regelnummer] Eer dat hi noch sceit van my Mi is lief dat hi hier is so by Sijn liegen en sel hem hier niet vromen Dat hy van my yet can comen SJet heer dese loze catijff 6265[regelnummer] Verriet eens alte zeer mijn wijff Hy deedse eens alte diep waden int slijck Bijt water onder enen hogen dijck Ende maecte hair wijs dat sy den steert Jnt vater staec dair soud ter veert 6270[regelnummer] Also veel visch aen biten gi sult weten Sy en soudse niet myt hair vierde eten Sy waende waers die arme dwaes Ende ten buuck toe in die maes Eer sy totten water quam 6275[regelnummer] Dair sy doe totten stert in swam So sy alre diepste conde Dit was in enen wijnter stonde Datse dus bedrooch reynert Want sy hielt so lang den steert 6280[regelnummer] Jnt water dat sy dair in beuroos So wat sy tooch sy en mocht niet loos Wtten yse doe hi dat sach Liep hi dair toe al dat hi mach Ende spranc achter op tlijff 6285[regelnummer] Och dair vercrachte hi mijn wijff Sy en cond geweren het hair toren So hert stont sy int ijss beuroren
[Folio 97v]
Dit en can hi niet missaken Want ic vant hem opter braken 6290[regelnummer] Also ic liep om mijn beiach Ende opten dijck mijn wech lach Sach ic hem beneden op hair staen Crijdsen lijdsen steken slaen Alsmen pleecht tot sulken speel 6295[regelnummer] Och dair leet ic hert zeer veel Doe riep ic reynaert wat doe dy Doe hy so na hoorde my Spranc hi op ende ghinc sijnre straten Jc ghinc tot hair myt droeuen gelaten 6300[regelnummer] Ende most int slijc zeer diep waden Ende in dat coude water baden Eer ic dat ijs ontwee gedoste Ende haren steert dair wt loste Nochtan liet zijs dair een groot stick 6305[regelnummer] En dair toe waren sy end ick Wel na doot bleuen van galp So lude van smert eer ic se wt halp Dattie dorpers dat vernamen Ende op ons gelopen quamen 6310[regelnummer] Mit pieken haken ende stocken Ende die wiue myt haren spynrocken Dair riepen sy slaet alle toe Jc en creech nye meerre anxt dan doe Ende dat selue soude oec mijn vrouwe 6315[regelnummer] Want wi ontquamen al door nauwe Wi liepen dat tsweet wt brac Dair was een dorper die na ons stac Mit enen pieck die wel was lanck Die deed ons alte groten dwanck 6320[regelnummer] Want was sterck ende licht te voet Ten wair dat ons die nacht bestoet
[Folio 98r]
Wy waren dair zeker beide bleuen Die lelike quamen myt sterken steuen Hadden ons so gern gesmeten 6325[regelnummer] Sy seiden wi hadden hair scaep gegeten Ende boden ons mennigen ramp Dair gingen wi door mennige camp Bewassen myt braem ende biesen Dair mosten ons die dorpers verliesen 6330[regelnummer] Ende dorsten by nacht ons niet volgen Sy keerden weder zeer verbolgen Om dat wi also ontgingen Siet heer dit sijn lelike dingen Dits moort. cracht. ende verraet 6335[regelnummer] Dat v scerpelic te rechten staet REynaert sprac heer wair dit waer Dat ghinc mijnre eren alte naer God verbiets my dat ment so vond Tis wair ic wijsde hair teenre stond 6340[regelnummer] Hoe sy visschen soude vaen Ende enen goeden wech ouer te gaen Een water. sonder te treden int slijck Mer si liep so gierichlijck Doe si die visschen hoorden nomen 6345[regelnummer] Sy waende niet te tide te comen Sy en hielt wech noch wise So dat sy beuroos inden yse Dat dede dat sy te lange sat Sy had vissche genoech gehat 6350[regelnummer] Had sy myt reden willen liden Diet al wil hebben het valt bi tiden Dat hi van allen missen moet Alte gierich en was nye goet Want nyement en kan den gierigen versaden 6355[regelnummer] Doe ic se zach zo zeer beladen
[Folio 98v]
Doe waende ic hair te helpen wtter noot Jc hieff ende ic ludse ende ic croot Om dat ic waende wt te boren Mer dat was arbeit verloren 6360[regelnummer] Want sy was my alte swaer Doe quam ysegrym aldair Ende sach hoe dat ic croot ende stack Dat hi doe in dorperheiden track Als die quade te doen plegen 6365[regelnummer] Aldus so was die zaeck gelegen Ende heer ten wass anders niet dan logen Mer ic meen hem schemerde sijn ogen Also hi ons sach van bouen int dal Dair hi opten dijck sat 6370[regelnummer] Hy vloecte my zeer ende swoer bi dat Sijn magen ic soud becopen Doe icken hoorde ginck ic lopen Ende lieten scelden ende dreigen Doe ghinc ic heffen ende wegen 6375[regelnummer] End halp sijn wijff wtten diepen Off die dorpers lude riepen Ende iaechden dat was hem goet Want sy verwermden hair bloet Sy waren anders van coude veruroren 6380[regelnummer] Ende wat ic na ofte voren Heb geseit dats al waer Jc en naem aen goude claer Niet dusent merck van goud Ende ic v eens liegen soud 6385[regelnummer] Soud ic v liegen lieue heer Dat soude my mysvoegen zeer Dat en sel offt god wil nvmmer wesen Jc genees so ic mach genesen Ende ic sel vmmer seggen waer
[Folio 99r]
6390[regelnummer] Jc hebt geplogen al mijn iaer Synt dat ic eerst wijsheit began Ende twiuelde v oec anders dan Van allen dat ic hier heb geseit Dattet yet wair dan al wairheit 6395[regelnummer] Geeft my achte dage spaci Jc sel v doen sulke informaci Mit goeden gelouelic orcond Dat gijs my al v leuens stond Wel selt gelouen ende te baroen 6400[regelnummer] Wat heb ic mitten wolue te doen Of ander sijnre geliliker katyue Vraecht seluer sinen wiue Dat ic eer seide oft so geuel Sy selt selue liden dat weet ic wel 6405[regelnummer] Doe sprac vrou eerswijn Waen reynaert fel quaet cockijn Nyement en can hem hoeden voor dy Du const dijn loosheit so brengen by Ende dijn beraet so wel versconen 6410[regelnummer] Dattet di noch qualic sal lonen Jnt eynd al ist dat lange merret Hoe hadstu my eens besperret Ten put dair die twee emmers hingen Die myt eenre poleyen gingen 6415[regelnummer] Op ende neder als men woude Du saetste in groter ongehoude Beneden opt water inden enen Jc quam tot v ic hoorde v stenen Jc vraechde di hoe du quaemste geseten 6420[regelnummer] Du seitste ic heb so veel geten Visschen al hier inden born Dat my spliten mach die korn Hoe coom ic daer wijst my dat
[Folio 99v]
Doe seitstu moeye sprinck in dat vat 6425[regelnummer] Dat dair hanget gi coomt hier zaen Ende ic deed doe most ic neder gaen Mer du quames doe was ic gram Ende vraechde hoe dattet dair toe quam Het is der werlt loop spraecstu weder 6430[regelnummer] Dat een gaet op ende dander neder Doe sproncstu wt ende ginges henen Ende ic bleef dair allenen Honger ende coud enen haluen dach Dair ontfenc ic mennigen slach 6435[regelnummer] Eer dat ic rwmde van daen Moey het dede my onsacht ic waen Gi hads my lieuer dan ic die slage Want gi mocht se bet verdragen Ende onser een mostse vmmer ontfaen 6440[regelnummer] Jc leerde v wildijt verstaen Dats dat gi op een ander tijt Te bet op v huede zijt Ende nyement en gelooft te licht Ellic zuect hem seluen om sijn baet 6445[regelnummer] Het wair een dwaes die dat vergaet VOort lieue heer sprac eerswijnde Hoe wel seilt hi myt alle wijnde Hoe schoon met hijt voor den ogen Aldus heeft hi my dick bedrogen 6450[regelnummer] Sprac ysegrim ende gebracht in scaden Hy my oec eens verraden Totter apynnen sijnre moeyen Dair was ic in groten vernoeyen Ende mijn oor wel na liet 6455[regelnummer] Weet voorwair hoet is gesciet Wil hij twair seggen ic laet hem die tael Want ic soudse vmmer so wael
[Folio 100r]
Seggen hi en sel my berispen Ja ic ysegrim sonder lispen 6460[regelnummer] Sal ic v seggen ende ooc al clair Jc bid v allen hoort dair naer Hy quam aen my in geen wout Ende claechde synen honger mennichfout Want ic sachen nye so mat 6465[regelnummer] Hy en had gern meer gehat My wondert wair hi die spise laet Noch sie ic wel aen sijn gelaet Dat hi van honger begint te grymmen Hy aet lieuer dan hi zaach spynnen 6470[regelnummer] Dan hi dronck een aem wijns Doe ic hoorde so iamerde my sijns Jc seide ic zueck mijn beiach Dair gingen wy te samen enen dach Dat wi niet en vonden teeten 6475[regelnummer] Doe begond hi zeer te trecken Ende seyde hi en mocht niet veerre gaen Doe sach ic dair een hol staen Onder enen hage van dicken bramen Dair hoordic wat in scramen 6480[regelnummer] Doe seide ic tot hem gaet dair in En suect off gi dair vint v gewin Ten mach niet sijn gi en vijnt dair wat Doe seide hi neue in dit gat En coom ic niet om hondert pont 6485[regelnummer] Jc en wist eerst hoe dair bynnen stont Het dunct my dair so gruwelic wesen Mer ic sel hier onder desen Vwer verbeiden gaet in voren Ende keert cort weder ende laet my horen 6490[regelnummer] Hoet dair in gescapen staet Ghi kvnt so mennigen nauwen raet
[Folio 100v]
Ende v bet te onthelpen dan ick Siet heer dus wijsde hi my int strick My arm wicht cleyn ende cranck 6495[regelnummer] Ende hi die sterck is groot ende lanck Bleeff leggen rusten in sijn vrede Besiet wat trouwen ic hem dede. DEn anxt die ic dair bestoet En leet ic noch om geen goet 6500[regelnummer] Jc en wist dattet my so vergaen soude Jc ghinc dair bynnen als die boude Dair vant ic enen breden ganck Crom doncker ende lanck Eer ic bynnen dat hol quam 6505[regelnummer] Dair ic grote clairheit vernam Die lucht die dair in quam van besiden Dair lach een groot aep myt twe widen Ogen. die blencten als een glas ende vier Jc en sach nye so vroliken dier 6510[regelnummer] Mit groter mwl myt langen tanden Ende scerpe nagelen aen voot ende handen Mit enen langen stert aent set Jc waen het wair een mamet Een bakumijn op een meer kat 6515[regelnummer] Jc en sach nye leliker dier dan dat Ende bi hair lagen doe te sprong Hair drie kijnder lelike iong Die hair moeder wel geleken Doe sy my quamen comen steken 6520[regelnummer] Swegen sy ende sagen my lelic aen Jc had wel gewilt te sijn van daen Jc was verueert wat baet versaect Doe docht ic bin dair in geraect Jc moet dair wt al ic best mach 6525[regelnummer] Sy was meerre dair sy lach
[Folio 101r]
Dan ysegrim end hair kijnder Waren eer meerre dan ic eer mynder Mer ic en sach nye sulken proy Dat hair vrijn had bewraect 6530[regelnummer] Sy waren belabbert ende beclat Ten oren toe van haers selfs dreck Het stanc dair vuyl dan hels peck Wel was icker na off gescrict Al had ic van eerst gemict 6535[regelnummer] Twair te seggen ic most vertijen Ende mitten hoop die dair lach lyen DOe seide ic god diet wel doen mach Moeye die geef v goeden dach Ende uwe kijnder mijn magen 6540[regelnummer] Het sijn die scoonste van haren dagen Die ic ye gesach voor ofte na by Deus hoe wel behagen sy my Hoe lieflic sijn si ende hoe schoon Ellic mocht myt eren eens conincs soen 6545[regelnummer] Wesen. wi mogen v louen myt recht Dat gi dus meerret onss geslecht Jc had grote bliscap gedreuen Had ic geweten van desen neuen Want het is een troostelic toe tiden 6550[regelnummer] Jc en mochts niet langer liden Doe ic hoorde dat gi waert verlegen Jc en moste uwes comen plegen My wair leet ic en had vernomen Reynaert lieue neue west welle comen 6555[regelnummer] Jc weets danck dat gi my vant Ghi zijt oec wijss ende trou becant Ende hebt des gern voor ogen Gy moet uwe neuen oec wijsheit togen Ende laten doen eer ende tucht
[Folio 101v]
6560[regelnummer] Jc heb recht op v geducht Want gi wandert onder die goede Och hoe wel was my te moede Als ic dese tael hoorde Dit verdiende ic te eersten woorde 6565[regelnummer] Mittien dat icse moey hiet Al seid ic so sy en bestont my niet Mer mijn rechte moey staet ghinder Vrou rukenau die scoon kijnder pleget te wynnen sedich ende vroet 6570[regelnummer] Jc seyde moey lijff ende goet Staet tuwen gebode wes ic vermach Gebiet tot my nacht ende dach Jc sel hem leren dat ic kan Jc had gern geweest van dan 6575[regelnummer] Om dattet na die wiege dair roock Ende bi sonder om ysegrim oock Die so herteloos van honger Jc seid moey v ende ionger Moet god altoos behoeden 6580[regelnummer] Jc wil thuus wart gaen spoeden My wijff sel na my verlangen Neue gi en selt nergent gangen Ghi en hebt eerst gegeten sat Ende liet gijt oec ic seg v dat 6585[regelnummer] Jc soud in groter ongunst verstaen Doe stont hi op ende dede my gaen Jn een ander hol dair by Dair lach so veel spisen dat my Vonderde wan sy was comen 6590[regelnummer] Herten hijnden ic en cans niet nomen patrisen. roeken. ende recaluen Mit al dese mocht ic my saluen Ende doe ic van als had genoech
[Folio 102r]
Gaff sy my dat ic myt my droech 6595[regelnummer] Een stuc vleisch van enen hijnde Mit mynen wiue myt mynen kijnde Teten als ic thuus quame Dat nam ic in groter scame Mer het moste vmmer wesen 6600[regelnummer] Jc dancte hair zeer ende myt desen Heb ic oorloff aen haer genomen Ende sy hiet my corts weder comen Jc seide dat ict laten soude node Hier mede beual ic se te gode 6605[regelnummer] Ende sciet haestelic van danen Blidelic dan yement soude wanen Om dat my het scoonste geuel Jc maecte my te lopen snel Ten gate dair ic wt quam 6610[regelnummer] Ende doe ic ysegrim vernam Die lach ende onder enen boom Vraechde ic hoe staet myt v oom Qualiken seide hi lieue neue Tis meer dan wonder dat ic leue 6615[regelnummer] Jc sterue van honger geeft my doch yet Doe iamerde my zeer sijn verdriet Ende ic behielt hem dair dat leuen sijn Die dair lach in groter pijn Hy wist my dair veel groten danck 6620[regelnummer] Al is die gunst nv dus cranck WEl cort had hijt op geslonden Doe seide hi neue wat heb di vonden Jn dat hol dat laet my horen My hongert nv meer dan te voren 6625[regelnummer] Want mijn mont is nv ter spijs gewect Jc seide oom gereet so trect Jnt hol gi selt genoech dair vijnden
[Folio 102v]
Daer leit mijn moey myt haren kijnder Condi wel liegen ende die warenheit sparen 6630[regelnummer] So seldi hebben al v begaren Mer seg di twair v naect verdriet Heer coninck en was dit niet Genoech gewaerscuut diet verstonde Dat hi van al dat hi vonde 6635[regelnummer] Contrari dair off soude seggen Mer rude onbesnode beleggen Ende connen geen wijsheit gegronden Dair om haten sy subtijl vonden Want si se selue niet en verstaen 6640[regelnummer] Nochtan seide hi sonder waen Ende liegen so zeer eert hem onuochte Dat ment voor wairheit tellen mochte Hier ginck hi mede in dat hol Dat van vuylen stanck was vol 6645[regelnummer] Dair vant hi die mermot sitten Die lelic was ende ongescitte Des duuels dochter moedecack Een dinck myt spisen stont dair geclack Doe riep hi wopen myt gruwelt zeer 6650[regelnummer] Sy sien hier oft die duuel weer Dese lelike Juckers iongen Waen comen sy wtter hellen gesprongen Men mocht dair duuels meed veruaren Gaet drenctse qualic moetten se varen 6655[regelnummer] Jc en sach nye so lelike wormen Al mijn hair stont my te stormen Van aen te sien alst billix es Heer ysegrin wat mach ic des Het sijn vmmer die kijnder mijn 6660[regelnummer] End ic moet hair moeder sijn Wat hebdi dair mede te doen
[Folio 103r]
Waer sy lelic sijn ofte scooen Sy en hebben v niet gebeden Sulc heeft voor hem geweest heden 6665[regelnummer] Die beter is ende wiser dan gi Ende oec na maech die seide my Dat si scoon en sedich waren Wat doe dy hier myt deser maren Wi en seynden v geen bood wildijt weten 6670[regelnummer] Jc wil van uwer spisen eten Het is bet bestaet aen my Dan aen die wichteren hier en is seit hy Niet teten sprac hi het is genoech Mittien hy thooft ter spijs wart droech 6675[regelnummer] Hy quam voor thol ende woud dair in gaen Mer mijn moey die scoot op zaen Mit haren kijnderen ende liepen hair toe Ende wonden hem zeer doe Mit haren nagelen scerp ende lanck 6680[regelnummer] Dat hem tloet wtten ogen spranck Jc hoorden kriten ende hulen zeer Mer en vermat hem geenre Hy en deed anders niet dan hi vlo Wtten hool hi was also 6685[regelnummer] Seer gecrabbet ende gebeten Dat sijn vel al was gereten Jn sijns selfs pels mennich gat Sijn aensicht was van bloede nat Ende van sijn oor oec off een stick 6690[regelnummer] Hy croonde my zeer doe vraechd ick Off hi hem liegens onderwant Hy sprac ic seide so ict vant Een lelike teue een vuyl vracht Neen oom gi soud hebben gesacht 6695[regelnummer] Hoe staet myt v wel lieue nycht
[Folio 103v]
Dit sijn mijn mage naden richt Ende mijn scoon neue dese iongeling Jc had lieuer datmense hing Sprac hi dan ic dat had gedaen 6700[regelnummer] Ja oom dair om most gi ontfaen Al sulc payment als ghinc daer Gi sout contrari hebben geseit al claer Men moet om beters wil bi tiden Liegen ende die waerheit myden 6705[regelnummer] Onse beter hebbent voor ons gedaen Siet heer dus quam dair aen Dat hi gecreech die rode huue Nv staet hi als een sympel duue Vraecht hem oft also geuel 6710[regelnummer] Hy was dair so na hi wetet wel SPot ende scaemt sijn spitige tael Fel reynaert die condi wael Gy segt ic wel na doot was Van honger gi loofde my op dat pas 6715[regelnummer] Dats want dat been dat gi my gaeft Dair had ghi tvleisch al off geknaecht Dat dair niet een twijnt was aen Ende spotte myt my doe zaen Dat ic verhonger dair ic sta 6720[regelnummer] Ghi sprect mijn eren alte na Wat heb di mennich spitich woort Mit logentael op my brocht voort Ende dat ic stont na des conincs leuen Om den scat die ghi hem sout geuen 6725[regelnummer] Ende wisen sout in hulster lo Ende hebt mijn wijff bedrogen so Dat sy blijft gescandeleert Jc wair ewelic onteert Wraeck ic des niet nv gi hier sijt.
[Folio 104r]
6730[regelnummer] Jc heb so lange verdragen den tijt Gy en zijts niet weert men spreects my lachter Ghi en moget nv niet trecken achter Jc en can niet veel callen Mer ic ty v hier voor hem allen 6735[regelnummer] Dat gi een verrader ende een morder zijt Jc selt v doen lyen in een crijt Op enen dach lijf tegen lijff Ende des coomt ten eynde onse kijff Siet hier ic biede v den hantscoe 6740[regelnummer] Jc wil dair voor steruen off brengen toe Die recht heeft het sel wel bliken Dit en condi reynaert niet geliken Hy dochte hoe coom ic hier aen Dat ic camspul moet bestaen 6745[regelnummer] Tegens desen sterken vraet Nv byn ic teynden mynen praet Op te nemen en dooch niet gelaten Het coomt te scade of te baten
[Folio 104v]
DOch hoe ic vaer het moet wesen 6750[regelnummer] Jc hebbe veel vordels in desen Want hem sijn noch die claeuwen voren So zeer so hi was bescoren Doe hise door my moste ontscoeyen Dair in sel icken zeer moeyen 6755[regelnummer] Ende sijn weer wart veel te quader Doe sprac hi morder ende verrader Yement die dat op my wil leggen Dair liegen sy aen al diet seggen Ende gi voor in heer ysegrijm 6760[regelnummer] Ghi bracht my dair ic wil sijn Hier om heb ic al gebeden Siet hier mijn pant dair alle vrede Valsch sijn ende ghi dair toe Die coninc ontfenct die wed ginck doe 6765[regelnummer] Ende sprac set gi twe ons wedden borgen Dat gi opten dach van morgen Ten krijt coomt als camperoen Ende te doen doen dat gi sculdich sijt te doen Doe wart die cater ende die beer 6770[regelnummer] Borge voor ysegrim den heer Bitelmuus die dass grymbaert Verborchden den voss reynaert NEue sprac tot hem die apyn Sijt wel voorsien ende wijs van syn 6775[regelnummer] V oom leerde my eens een less Dat seer seech salich ess Den genen die camp vechten moet Een groot clerc een myster vroet. Gaft hem ende die abt van bandelo 6780[regelnummer] Ende seide hem oec also Want hy sijn clerc te wesen plach Dat men niet verwynnen en mach
[Folio 105r]
Bynnen dien dage in genen strijt Hem dienen dan ter mergen tijt 6785[regelnummer] Mit nuchteren mond ouerleeft Dair om neef sijt ongeureest Jc sal voer v lesen alle morgen So en dorfdi voor den wolf niet zorgen Hy en mach v nergent oec doen wee 6790[regelnummer] Het is beter camp dan hals ontwee Groten danck mijn lieue moeye Mijn zaeck is recht dair op ic roeye Dat hoop ic sel zeer helpen my Al reynaerts magen bleuen hem by 6795[regelnummer] Des nachts ende holpen hem corten den tijt Vrou rukenau socht hair profijt Ende die sijn vordel seer begeerde Dede hem tusschen thooft en den steert reynerde Sijn hair altemael off scheren 6800[regelnummer] Ende dair na al myt oly smeren Doe wart al dat lijf so glat Men cond dair nergent aen hebben vat Want hy was vet ende wel geuoet Neef sprac sy ziet wat gi doet 6805[regelnummer] Ghi selt v seer te drincken pinen So maect gi morgen te meer vrinen Mer houtse wan gi coomt int krijt Ende alst v noot is en dunct tijt So seict vol uwen rugen staert 6810[regelnummer] Ende slaet den wolf in synen baert En mochdi hem in sijn ooch geraken Ghi soud sijn lucht seer duuster maken Ende dat mocht v seer vromen Ende hem tot groten hijnder comen 6815[regelnummer] Mer sel di al in een Vwen stert houden tusschen die been
[Folio 105v]
Op dat hi v dair bi niet en vat Ende die oren hout so plat After waert leggen aen v hooft 6820[regelnummer] Op dat hi v dair niet en noost So en mach hi v niet deren End pijnd v wijslic hem te verweren Ghi selt eerst wiken voor sijn slagen Ende laten na v springen ende iagen 6825[regelnummer] Ende vmmer loopt tegen den wijnt Dair gijt stoff ende sant diepste vijnt Dat doet mitten voeten op scuven Hier mede sel di hem seer huuen Want het sel hem in die ogen waeyen 6830[regelnummer] En dair sel tsien mede verdraeyen Ende die wijl dat hi dan wist sijn ogen So suldi om v vordeel pogen Biten ende slaen welc v dunct zienste Ende ymmer doet hem dan een dienste 6835[regelnummer] Jn sijn aensicht myt uwer piss Dan en sel hi niet weten wair hi is So seer sel di hem dair meed verdoren Mer ymmer laet hem v iagen voren Tot dat hi een deel is vermoeyt 6840[regelnummer] Hem sel tragen seer den voet Al is hi groot hi en heef geen hert En die claeuwen doen hem groot smert Om dat gise hem vilen daet Neue dit is mijn beste raet 6845[regelnummer] COnst gaet dicwill voir cracht Siet dat gi v wel wacht Ende so wijslic set ter weer Dat gijs en wi alle hebben eer Misquaem v yet dair wair my leet 6850[regelnummer] Jc sal v leren mynen streeck
[Folio 106r]
Dat my v oom leerde mertijn Op dat gi verwynre moet sijn Also gi sult ic en twiuel niet Mittien si die hant voort stiet 6855[regelnummer] Die sy op sijn hooft leide Ende dese woorde seide Blaerde scaeye sal penis Carsbij gor sous abe firnis Neue nv sidi wel bewaert 6860[regelnummer] Voor al mysual zijt onuervaert Ende neemt v rust dat is mijn raet Want het is op dageraet Rust een luttel het dunct my goet Ghi wart veel te bet gemoet 6865[regelnummer] Wi sellen v wecken wel te tide Moey sprac hi bin ic blide Goods loon moet gi ontfaen Ghi hebt my so veel gedaen Jc en machs v nemmermeer voldancken 6870[regelnummer] My dunct my en mach nyement crancken Synt gi my dese heilige woord laest Doe ghinc hi slapen mitter haest Onder enen boom int grass Al tot dat die son hooch op was 6875[regelnummer] Doe quam die otter tot hem gegaen Ende vecten dat hi op soud staen Ende gaf hem enen entvogel ionck Neue sprac hi mennige spronck Heb ic gesprongen te nacht 6880[regelnummer] Eer ic dese myt mijnre cracht Enen vogelaer genam By helre broeck recht aen den dam Nv neemt ende eten mitter vaert Dese hant gift sprac reynaert
[Folio 106v]
6885[regelnummer] Ontseide ic dit so wair ic sot Dat gi mijns gedocht dat loon v god Jc selt verdienen mach ic leuen Reynaert dat hem was gegeuen Het smaecte wel het ghinc al yn 6890[regelnummer] Vier grote tuegen end oec niet myn Scoonre fonteynen hi dair na dranck Doe ghinc enen snellen ganck Ten rytenweert myt synen magen Dien mynden ende sijns plagen 6895[regelnummer] Ende als hem die coninc vernam Dat hi also bescoren quam Ende ouer al sijn vel gesmeert Doe sprac hi aey vos reyneert Hoe wel condi tot v seluen zien 6900[regelnummer] Hem allen verwonderde van dien So nywelic was hi int aenscouwen Hy neech den coninc myt sijnre vrouwen Mitten hoofde sonder spreken Ende is recht int krijt gestreken 6905[regelnummer] Dair die wolf doe was bynnen Mitten genen die hy doe mynden Ende spraken mennich hooch woort Die krijt wachters brochten die heiligen voort Dat was die lupert en die oss 6910[regelnummer] Die wolf die zwoer voor dattie voss Een morder was ende een verrader Ende arger mocht hi wesen quader Dat soud hi op hem maken waer Ende reynart die voss die swoer al daer 6915[regelnummer] Dat hijt looch als een vuyl katijff Ende makent waer dair op sijn lijff Doe sy den eet hadden geswore Spraken die crijt wachters te voren
[Folio 107r]
Doet dat gi sculdich te doen zijt 6920[regelnummer] Doe rwmden sy alle dat krijt Mer vrou rukenau die bleef staende By reynaert ende hem vermaende Dat hi doch op die woord Die hi van hair had gehoord 6925[regelnummer] Voor die dageraet vroech doe Neue sprac sy siet wel toe Het is v stuck het gaet v aen Ghi const wel spreken ende gaen Doe gi zeuen iaer waert out 6930[regelnummer] Oec meen ic dat gi noch wel zout By nacht int duuster gaen sonder dwalen Dair gi wat goets wist te halen Al en haddi lantern noch maneschijn Ghi heet alle wege wijs te sijn 6935[regelnummer] Onder die gene die v kynnen Pijnt nv uwen viant te verwynnen So heb di ewelic den prijs Wel lieue neue ic bins wel wijs Dat gi mijn beste zeer begeert 6940[regelnummer] Jc sel dair om dencken sprac reyneert Ende huden alsulcke eer beiagen Dat gi ende alle mijn magen Dess eer selt hebben ende mijn viant Scade toorn ende groot scand 6945[regelnummer] Alle die dage die sy leuen Hert syn en moet begint hem te verheuen Jc denct hem so te brengen by Als wi te samen sijn te kry Dat hi en sel niet weten daer 6950[regelnummer] Wair hi hem hueden sel voorwaer Jc selt hem so na leggen myt list Twaer scade dat hi al dinck wist
[Folio 107v]
SJ sprac god gunst di neuelinck Mit desen si wtten krijt ghinck 6955[regelnummer] Ende liet die twee kempen alleen Die te hant worden hant gemeen Die wolf quam tot hem myt groten nijt Ende ondede sijn poten zeer wijt Ende waende reynaert dair in vaen 6960[regelnummer] Mer reynaert die ontspranc hem zaen Want hi was lichter dan hi te voet Die wolf spranc na hem mitter spoet Grote spronc ende ghinc hem iagen Haerre tweer vrunden ende magen 6965[regelnummer] Stonden buten tkrijt en zagen toe Die wolf screet wider dan reynaert doe So dat hi en after haelde saen Hi hief op den poot ende meenden slaen Mer reynaert zach hem so by 6970[regelnummer] Ende sloech synen rugen stert die hy Vol had geseict hem int aenschijn Doe waende blint warden ysegrijm Want die seick ghinc hem in die ogen Doe most hi rusten ende pogen 6975[regelnummer] Want die ogen dair of reynichde Die reynaert die sijn quaetste meynde Ghinc doe staen scrauen in dat mol Ende deeds hem stuuen die ogen so vol Alsoot op stoof onder den wijnt 6980[regelnummer] Dat ysegrim wart so zeer verblint Dat hi alle die weer begaff Want dat sant ende dat mul zeer claff Hem mitter pissen in doge so veel Dattet ghinc al wtten speel 6985[regelnummer] Het smerte hem so dattet traende Hy wreef hi wischde doe quam gaende
[Folio 108r]
Reynaert myt groten nyden Ende sloech hem drie wonden widen Mit sinen tanden in sijn die 6990[regelnummer] Wat ist beet v dair een bie Sprac hi her wolf hoe sider aen Jc sel v noch ander toe gaen Jc heb noch was nywes bedocht Ghi hebt v droefheit lang gesocht 6995[regelnummer] Ende v scand nv heb dise vonden Ghi so mennich lam geslonden Ende mennich onnosel dier verraden Ende my mit groten onrecht in scaden Hier gebracht ende myt valschen treken 7000[regelnummer] Dat sal ic nv al op v wreken

Vorige Volgende

Reinaerts historie (Reinaert II)

Reinaerts historie, 6001-7000

Over het gehele werk

auteurs