|
| |
Reinaerts historie, 7001-7810
Want ic bin dair toe vercoren
V oude verdiente van hier te voren
Sel v nv recht in brengen
Want god en wils niet langer hengen
7005[regelnummer]
V quade boosheit v quaet regneren
Jc sal v van als absolueren
Dat gi hier penitencie doet
Weest verduldich in v sneuen
7010[regelnummer]
Want gi en selt niet langer leuen
V lijff dat staet aen mijn genaden
Mer trouwen waerdi so beraden
Dat ghi woud sueken aen my oetmoet
Val verwonnen op mijn voet
7015[regelnummer]
Jc woud v sparen al sidi quaet
Want mijn consciencie my raet
Dat ic nyement en dode gern
Jsegrim waende van desen schern
Onuroet te werden het deerde hem zeer
7020[regelnummer]
Hy en conste spreken mijn noch meer
| |
| |
So toornich was hi van herten
Ende ooc so began hem zeer te smerten
Die wonden die hem reynaert beet
Want dair tbloet wt liep gereet
7025[regelnummer]
Hi en docht om geen saken dair
Dan hoe hi mocht wreken sijn swair
MJt groten nyde hieff hi op den poot
End gaff reynaert enen slach groot
Op sijn hooft dat hi ter eerden vel
7030[regelnummer]
Doe scoot die wolf herde snel
Ende waende hem ter stont te vaen
Reynaert was licht ende spranc op zaen
Ende liep hem dapperliken toe
Een fel strijdt began dair doe
7035[regelnummer]
Die duerde dair lange tijt
Jsegrim die had groot nijt
Op reynaert alsoot wel sceen
| |
| |
Wel tien spronck spranc hi na een
Op hem end hadden gern geuaen
7040[regelnummer]
Mer die huut was hem so glat ic waen
Mittien dat hi was so wel besmeert
Dat hem al ontquam reyneert
Hi en mochts niet gripen sijn vel
7045[regelnummer]
Dat hi dicke al hien waende slaen
Js hi hem tusschen die been ontgaen
Onder sijn buuck ende sloop so door
So liep hi dan weder voor
Ende gaff hem enen aefschen hou
7050[regelnummer]
Ende mitten stert sijns pissens dou
Sloch hi en in sijn ogen dicken
Dat ysegrim waende sticken
Ende nochtan dat meeste let
Doe hi myt pissen so was besmet
7055[regelnummer]
Ghinc int slijc en sant staen scrauen
En dede hem dat stoff int ogen drauen
Op sijn vordel mitten wijnd
Hem docht dat hijt had alte quaet
7060[regelnummer]
Doch sijn cracht ende sijn daet
Was reynaert een groot last
Ende mennigen onsachten tast
Als hi en te pass cond begaen
7065[regelnummer]
Want was sterc ende groot
Mennigen beet slach ende stoot
Gauen sy malcander dair si mochten
Seer nauwe sy hem onder sochten
Om malcander te verderuen
7070[regelnummer]
Jc woud ic noch een weruen
Al sulken camp mocht aensien
| |
| |
Jc sagen lieuer mocht my gescien
Dan van riden in een perck
Die een was listich ende die ander sterc
7075[regelnummer]
Deen vacht myt crachten dander mit liste rade
Si pijnde zeer malcanders scade
DJe beste van hem beiden en was niet goet
Den wolf toornde in sinen moet
Dat reynnaert so lange onstont
7080[regelnummer]
En wair dat si so was gewont
Reynaert had den camp verloren
Mer die waren noch so open
Dat sy dair qualic of mocht lopen
7085[regelnummer]
Ende reynaert mocht bet aen teyde off
Die hem pis mul ende stoff
Dicht altijt in sijn ogen swanck
Ende maecte hem dat sien so cranck
Dat hi duchte voor sijn ogen
7090[regelnummer]
Ten lesten sprac hi ic wil pogen
Een eynde te maken desen kijff
Hoe lange sel dese loze katijff
Voor my dueren ic bin so groot
Jc souden billix vallen doot
7095[regelnummer]
Al en dede ic dair toe niet el
Jc bin groot scande weert wel
Men sel myt vingeren hair ende dair
Na my wisen ende maken spot
7100[regelnummer]
Jc heb noch dat quaetste lot
Want ic bin so zeer gewont
Dat ic bloede als een hont
Ende dair toe warpt hi my so wol
Jn mijn ogen stoff ende mol
7105[regelnummer]
Ende door drenct my so myt pissen
| |
| |
Dat ic mijns siens cort sel myssen
Laet ic hem lange voor my dueren
Jc wilt al setten ter auentueren
En zien wat my geuallen mach
7110[regelnummer]
Mittien sloech hi enen slach
Op reynaerts hooft also groot
Dat hi op die eerde scoot
Ende eer hi wel op conde staen
Heeft hi en in sijn poot geuaen
7115[regelnummer]
Ende hielten onder hem leggen stil
Hi ginck hem persen ende duwen
Doe began hem seer te gruwen
Ende te droeuen al reynaerts magen
7120[regelnummer]
Doe sy en so onder leggen sagen
Mer ysegrims magen waren vroe
Reynaert weerde hem ymmer toe
Mit sinen clawen van onder op
Ende gaff den wolf mennigen clop
7125[regelnummer]
Want lach opwert mitten voeten
Die wolf en dorsts niet wel gemoeten
Mer mytten tanden heeft hi en gescoten
Na hem als dien verbiten woud
7130[regelnummer]
Doe reynaert sach dat wesen soud
Ende hi vmmer sijn verbeten
Heeft hi sijn vorste clawen gesmeten
Bouen in ysegrims aengesicht
Ende hael hem off wel gedichte
7135[regelnummer]
Die huut tusschen die wijnbraewen zeer lichte
Ende sijn een oge ghinc wt mede
Hi huulde hi iancte van herten zeer
Sijn vriend diet sagen haddens deer
| |
| |
7140[regelnummer]
Ende dreef iamerlic mysbaer
Dat bloet liep hem al neder daer
HY veechde sijn ogen wide
Reynaert die dit sas was blide
Hy worstelde so seer ende wranck
7145[regelnummer]
Dat hi op sijn voeten spranck
Die wijl dat hi sijn ogen vaechde
Die wolf die dit niet wel en hehaechde
Sloech na hem eer hi ontginck
So dat hi en in sinen arm vinck
7150[regelnummer]
Ende hielten vast oec hoe hi bloede
Reynaert die was doe weder te moede
Ende sette hem crachtelic ter weer
Dair worstelde hi so lanck so zeer
So dat ysegrim wies sijn toren
7155[regelnummer]
Beide van nv ende van voren
So dat hi alle smert vergat
Ende werp reynaert onder hem plat
Want sijn een hant die hi ter weer
7160[regelnummer]
Sette. dien scoot mitten val
Jn ysegrims kynnebacken al
Doe waende hi wel sijn hant verliesen
Jsegrim sprac nv gaet kyesen
Lijdt verwonnen tot deser noot
7165[regelnummer]
Off ic sal di seker slaen doot
Dijn stoff dijn piss scrauen ende scheren
En mach di helpen noch weren
Noch dijn treken du en conste ontgaen
Du hebste my so veel mysdaen
7170[regelnummer]
Scade ende scande hier te voren
Ende nv heb mijn ooch verloren
Ende bin dair toe so zeer gewont
Doe reynaert hoorde dat so myt hem stont
| |
| |
Verwonnen te liden of den doot slach
7175[regelnummer]
Docht hi dat aen die koor lach
Wel dusent merck na dat hem stoet
Nv hi dat een of dat ander moet
Seggen ende hi des heeft scade
Wart hi des wel cort berade
7180[regelnummer]
Lieue heer ende oom ic wil v man
Ende wesen heer van al mijn haue
Ende gaen voor v ten heyligen graue
Ende weruen v clooster wynnige daer
7185[regelnummer]
Ende alle kercken voor en naer
Die dair sijn int heylige lant
Ende brengen v hier in v hant
Voor v ende voor uwer ouder ziel
Jc waent den coninc nye en geuiel
7190[regelnummer]
Te bieden aldus sconen bot
Gelijck den paeus onse eertsche got
Willic ewelic dienen ende eren
Ende hulde sekeren ende sweren
V dienst knecht ewelic te wesen
7195[regelnummer]
Ende alle mijn mage te brengen tot desen
Dat si alle doen sellen gelijc
So sel di wesen een heer van desen rijc
Wie sel hem dorre steken tegen v dan
Ende wat dat ic geuangen can
7200[regelnummer]
Mit hoenre snyppen gansen patrisen
Visch off vleisch off wat spisen
Dat my geuallen mach te voren
Dair sel di eerst off hebben die koren
Ende v kijnder ende w wijff
7205[regelnummer]
Eer sy my coomt in mijn lijff
Dair toe sel ic tot ale tijt
| |
| |
Ende so wel tot uwen liue zien
Dat v niet en sel misschien
7210[regelnummer]
Ghi sijt sterc ende ic heet loos
Houden wi ons te samen altoos
Die een myt doen dander myt raden
Ons en sel nyement mogen scaden
Ende wi sijn doch so na geboren
7215[regelnummer]
Dat wi billix scade noch toren
Deen den anderen niet doen en souden
Jc had node strijt gehouden
Tegen v had ics mogen ontgaen
Mer gi spraect my te camp aen
7220[regelnummer]
Doe most ic doen dat ic nood dede
Doch heb ic hueschelic dair mede
Geleden so ic tegen v vacht
Jc en toende nye al al mijn cracht
Op v als off gi my vreemde waert
7225[regelnummer]
Want wat die neue den oom spaert
Dats grote reden ende wel staen
Lieue oom dus heb ic gedaen
Ghi haddet veel te quaet gehat
7230[regelnummer]
Mijn hert en mocht v doen geen quaet
Jc en heb v oec niet gescaet
Dat v deert in desen strijt
Dan ongeual dat nv ter tijt
Quam dat wt ghinc v een oge
7235[regelnummer]
Och des ic groten rouwe doge
Ende sulken iamer in mijn hert
Jc woudic seluer had den smert
Lieue oom ende ghijs te vreden waert
Jc sel sueken nv ongespaert
7240[regelnummer]
Dat icket scier sel doen genesen
Ende so salt v groot vordel wesen
| |
| |
Als gi wilt slapen off rusten an
So en heb di mer een oge te luken dan
Dair een ander moet luken twee
7245[regelnummer]
Noch sel ic v doen vordel mee
Want mijn wijff ende mijn kijnder
Ende mage meer ende mijnder
Sellen voor v knyelen door v eer
Daert die coninc sit onser heer
7250[regelnummer]
Ende alle die dair bi begeert
Ende bidden v dat gi uwen neef reyneert
By uwer genaden wilt laten leuen
Ende oec sel ic my sculdich geuen
Ende v scalc ende eygen te wesen altoos
7255[regelnummer]
Ende ic menedich ende truweloes
Tegen v geweest heb dicke
Ende oec sel ic seggen wat sticke
Dat ic hebbe van v geseit
Anders dan duecht ende reckelicheit
7260[regelnummer]
Dair heb ic valschelic aen gelogen
Hoe soude enigen heer mogen
Meer eren gescien dan ic v biede
Men mocht my geuen grote myede
Lieue oom dair ict om dade
7265[regelnummer]
Nv neemt in danck ende warts te rade
IC kenne ende lye dat gi wel sout
Mi nv hier doden off gi wout
Ghi most v altijt hueden dan
7270[regelnummer]
Voor min mage ende mijn geslachte
Ende wat lage v aen die machte
Dair om is hi wijs ende vroet
Die in synen toornigen moet
Hem niet en verhaest mer wel te versien
7275[regelnummer]
Watter hem na off mach gescien
| |
| |
Die wel versynt is in synen toren
Dair is grote wijsheit in geboren
Mennich dwaes van heten moede
Verhaest hem dick in ouer spoede
7280[regelnummer]
Dair hem coomt groot scand en scade
Dan rout hem na so ist te spade
Mer oom dair toe si di te wijs
Ende het is beter eer ende prijs
Gemack ende vrede en veel vrienden
7285[regelnummer]
Dan men om v lachten dienden
Ende oec so ist luttel eren dat
Hem die verwonnen is ende mat
Doot te slaen mer lachter groot
Wair ic leue off ic bin doot
7290[regelnummer]
Twaren dats een cleyn cost
Ay dief hoe gern waerstu verlost
Dat hoor ic wel aen dijn tael
Du en gaefste my niet een eyer scael
Waerstu van hier op dijn vri
Alle die werelt van goude root
Jc en laet di niet wt deser noot
Jc acht cleyn alle dijn magen
Jc sel die veet wel dragen
7300[regelnummer]
Al dattu hier hebste geseit
Js niet dan geuensde loosheit
Wat waenstu my aldus verleden
Jc ken di langer dan van heden
Jc en bin geen vogel myt caef te locken
7305[regelnummer]
Och hoe soutstu myt my vocken
Off ic di aldus liet ontgaen
Had een ander dit verstaen
Die niet en kende dijn dasen
| |
| |
Du soutsten licht verdwasen
7310[regelnummer]
Als hi hoorde v schoon loeyen
Mer du verlieste hier al dijn floeyen
Want ic versta te wel dijn tael ende logen
Du hebste my so dic bedrogen
Dat ic my wel huede voor dijn behoeue
7315[regelnummer]
Segt quade onreyn loos boeue
Du segest du heues my gespaert
Jn desen camp sich herwaert
Op my is mijn een oge niet wt
7320[regelnummer]
Doorwont meer dan tot .xx. steden
Du en gaefste my niet so veel vreden
Dat ic mijn adem mocht verhalen
Jc soude alte zeer dwalen
Dede ic di hier enige genade
7325[regelnummer]
So mennich confuus ende scade
Nochtan dat my bouen al gaet staen
Du hebste mijn wijff vrou eerswinde
Die ic gelijc my seluen mynde
7330[regelnummer]
Hebstu bedrogen ende ooc onneert
So dat si blijft gescandelizeert
Hoe soud ic dat vergeten mogen
Wanneer my dat coomt voor ogen
So vernywet my al mijn zeer
7335[regelnummer]
Doe docht reynaert enen nauwen keer
Die wile dat hi aldus tegen sprack
Sijn ander hant hi onder stack
Al beneden tusschen sijn been
En grepen recht alst wel aenscheen
7340[regelnummer]
Doe vast bi beid sijn hoeygen
En duden so dat hi van noyen
Wel lude moste briesschen ende hulen
| |
| |
Doe tooch reynaert wt sijnre mulen
Sijn hant die dair te voren in stack
7345[regelnummer]
Doe had Jsegrim sulc ongemack
Mit dat reynaert hem so ser tooch
Dat hy bloet van pynen spoech
Ende hem oec mede sijn groof orijn
Achter ontgleet van groter pijn
7350[regelnummer]
NOch deerde hem veel meer dan dit
Want hem so seer sijn ogen pit
Bloede dat hi al verdoefde
Also hem tbloet liep wtten hoofde
Hy storte neder in onmacht
7355[regelnummer]
Reynaert scoot toe myt cracht
Aen hem ende heeften gegrepen
Biden kullen ende heeften gaen slepen
Om dat krijt dair sijt alle sagen
Ende gaff hem veel steeck ende slagen
7360[regelnummer]
Des sijn vrienden droefden zeer
Si gingen ten coninc onsen heer
Screyende ende baden hem mennichfoud
Dat hi den camp op nemen woud
Het is my lieff die coninc seide
7365[regelnummer]
Doe gingen die krijt wachters beide
Ten krijt ende spraken reynaert
Onse heer die coninc wil v spreken
Ende wil dit oorlooch te samen breken
Ende desen camp opnemen nv
Ende bidt dat ghijt op neemt fier
Want waert dat uwer een bleef hier
Dat wair scade aen elke side
7375[regelnummer]
Ghi hebt die eer vanden cride
Alle die beste bliuen bi v
| |
| |
Reynaert sprac danck hebben sy nv
7380[regelnummer]
Jc en gerss niet scoonre dan gewonnen
Mijn mage comen hier geronnen
Jc wils hem vragen dunct v goet
Sy seiden ia reynaert dat doet
Tis reden dat men den vrienden seit
7385[regelnummer]
Grote saken dair macht aen leit
Ende men des volget haren rade
Mittien quam vrou sloppelcade
Ende hair man grymbaert die dass
Vrou rukenau die blide was
7390[regelnummer]
Ende huer twee susteren quamen daer
Bitelmuys vuylromp ende hair twe kijnder claer
Harenet hair dochter die derde mede
Die vledermuys ende twesel dair ter stede
Dar quammer twijntich meer ic waen
7395[regelnummer]
Dan off reynaert inden camp had gestaen
Diet wel gaet crijcht eer en loff
Mer diet mysualt dair vliecht men off
Niement en is dair ghern by
Die beuer ende die otter ende sy
7400[regelnummer]
Panthegrote ende oordelgole
Huer twe wiuen ende huer ostrole
Ende die maerter ende die bvnsinck
Die hermel die egel dat genetkijn
Die muyshoorn ende dat eenkoren
7405[regelnummer]
Ende al die ic noemde hier te voren
Quamen dair ende veel meer nochtan
Om dat hi den camp verwan
Ja die sulc die grote claech eerst dreuen
Op hem waren nv sijn naeste neuen
7410[regelnummer]
En toonden hem nv die meeste gonst
| |
| |
Ende noch is dit der werelt const
Die wel vaert crijcht veel magen
Die hem die weelde helpen dragen
Mer wie noot heeft ofte liden
7415[regelnummer]
Vijnt luttel mage tot allen tiden
Sy scuwen den wech dair hi gaet
Grote feest ende bli gelaet
Dreuen sy myt trompen ende myt scaelmeiden
Wel lieue neue dat sy seiden
7420[regelnummer]
God danck dattet aldus is vergaen
Wy waren in groten anxt beuaen
Doe wi v onder leggen sagen
Reynaert die dancte sijn magen
Ende ontfencse myt groter vroude
7425[regelnummer]
Doe vraechde hy off hy den coninc woude
Den camp op geuen by horen rade
Ja gi neeff sprac vrou slappelcaerde
Ghi moges hem wel louen myt eren
Doe gingen sy wtten krijt keren
7430[regelnummer]
Mitten krijt wachters totten coninck
Reynaert voor hem allen ghinck
Wt genomen die menestreel
Men trompter myt groten speel
Ende reynaert knyelde voor hem neder
7435[regelnummer]
Die coninc deden opstaen weder
Ende sprac sijt blide reynaert
Ghi hebt myt uwen dach myt eren bewaert
Ende ic laet v quijt ende vry
Ende geeft dit op ic hout aen my
7440[regelnummer]
Tusschen v tween dit wil ic leggen
Ende mijn goet duncken dair of seggen
Bi rade van mynen edelen lieden
Teerst dat ysegrim is genesen
| |
| |
7445[regelnummer]
So lange moetet in vrede wesen
HEer sprac reynaert my genuecht wel
Mer ic vant hier mennich op my fel
Doen ic hier aen v hoff eerst quam
Die nye scade van my en nam
7450[regelnummer]
Mer om dat hem luden docht
Dat men best ouer my mocht
So riepen si mede ouer mijn scade
Ende om dat hem docht dat ysegrim
7455[regelnummer]
Bet myt v was dan ic mocht sijn
Anders wair om en wisten si niet
Sy en dochten niet als die wise pliet
Wat dair off mocht bliken
Heer dese ende alle die hem geliken
7460[regelnummer]
Slachten wel een groot hoop honden
Die eens op eenre messen stonden
Teens heren houe diese had onthouden
Sy wachten als die gern souden
Eten off men hem wat brochte
7465[regelnummer]
Doe sagen sy comen al dat sy mochte
Enen hont gelopen wtter koken
Dair hi vleisch in had geroken
Ende had een been dair vleisch aen claff
Genomen eer ment hem gaeff
7470[regelnummer]
Ende pijnde hem heen dair mede wech te comen
Mer die cock had vernomen
Ende beliepen eer hi ontquam
Mit sieden water dat hi nam
Wt enen ketel in een plateel
7475[regelnummer]
Ende gaff hem dair mede sijn deel
After op sijn lenden stiet
So dat hijs hem en bedancte niet
Want hi hem so door scoude sijn vel
| |
| |
Dat hem sijn hair al wt vel
7480[regelnummer]
Ende hem die zwaerd al door scoot
Doch hi ontquam al wtter noot
Ende behielt dat hi dair nam
Ende hi biden honden quam
Ende sy hem tvleisch brengen zagen
7485[regelnummer]
Riepen sy dese can hem wel begiagen
Hi heeft den koc wel te vriend
Dair so veel vleisch aen claff
Die hont sprac gi en weetter nie aff
Ghi prijst my voor dair ghi tbeen ziet
7490[regelnummer]
Mer noch en saechdi my after niet
Siet my een eerst after opten steert
En prijst my dan off ics bin weert
NA doe sy hem achter besagen wel
Hoe dat hem tvleisch ende vel
7495[regelnummer]
Was doorsoden ende was al raeu
Ende sijn hair wt geuallen caelu
Gruwelde hem allen so voort scouden
So dat si ter costen niet en wouden
Sy en wouden oec sijns geselscaps niet
7500[regelnummer]
Mer alle dese hoop doe van hem sciet
Ende lieten hem varen als hi mochte
Her coninc heer dus hebben noch tgerochte
Die lose ghier als sy sijn heren
Ende sy crigen hair begeren
7505[regelnummer]
So warden si machtich ende ontsien
Sy slachten desen si scattense mittien
Recht als een verhongert hont
Dese dragen tbeen in haren mont
Niement en der tegen hem kyuen
7510[regelnummer]
Men prijst hem al dat si bedriuen
Elc seit hem dat sy gern horen
Op dat hi blijft ongescoren
| |
| |
Ende die sulc om dat sy lecken
Mede vanden hase ende helpense decken
7515[regelnummer]
Ende onsculdigen hoor bose dade
Aldus stercken sise int quade
Och heer die geen die des plien
Hoe luttel si after ten stert waert sien
Dats na teynde alst gode verdriet
7520[regelnummer]
Ende die auentuer langer niet
Hoor regnaci en wil gedogen
So vallen sy neder vanden hogen
Jn groter scande ende in scaden
So warden openbaer hair daden
7525[regelnummer]
Nyement hoors lidens dan verdriet
Men vloecse machmen hen anders niet
Sulc wart bescoren en so bschout
Dat hi noch goet noch eer en hout
Het haer valt hem wt aen beiden ziden
7530[regelnummer]
Dat sijn hair vrienden die hem ontgliden
Die hair boosheit verhuut hebben mede
By dage by nachte tot alle stede
Ende hebbense onsculdicht ende bedect
Mer nv myt screyen ellic van hem trect
7535[regelnummer]
Als sy hair ondaet moeten becopen
Recht als die hond gingen lopen
Vanden hont die dair was versoden
Also laten sise inden noden
LJeue heer dit exempel sel di
7540[regelnummer]
By uwer genaden onthouden van my
Ten sel uwer wijsheit niet scaden
Wat waendi hoe mennigen scalcken quaden
Vijnt men noch arger dan een hont
Diet tzuge been dragen in horen mont
7545[regelnummer]
Jn heren houe ende in stede
Die myt onrecht die vrihede
| |
| |
Ende gemeen recht vercopen
Ende ouergeuen om dat sy hopen
Dair off te hebben hair genot
Die des plegen wie sy sijn
Mer my noch die geslachte mijn
God danck en selmens niet verwiten
Dair off wil ic ons wel off quiten
7555[regelnummer]
Ende des comen in die lucht
Jc en heb voor nyement ducht
Reynaert die sel reynaert bliuen
Dat en sel hem nyement connen of vriuen
Al haddent al sijn viant gesuoren
7560[regelnummer]
Her coninc mijn hert heeft v vercoren
Jn ganser mynnen bouen allen heren
Ende nye en woud ic van v keren
Al is v anders doen te verstaen
Jc heb altoos v best gedaen
7565[regelnummer]
Ende voort meer doen dair ic kan
Reynaert gi zijt mijn homan
Van my beleent als edel baroen
Dair om si dijt sculdich te doen
Oec wil ic dat gi vroe ende spade
7570[regelnummer]
Coomt tot mynen secreten rade
Jc set v weder in al v macht
Siet dat gi v voor misdoen wacht
Helpt alle saken ten besten keren
Dat hoff en mach v niet ontberen
7575[regelnummer]
Als gi v wijsheit set ter duecht
So en is dair nyement die v verhoocht
Van scerpen raed van nauwen vond
Jc sel dair dencken lange stond
Om dat exempel dat gi my seit
7580[regelnummer]
Siet dat gi alle rechtueerdicheit
| |
| |
Hantiert ende my getruwe sijt
Jc wil voort meer tot allre tijt
Altoos wercken bi uwen rade
Hy en leeft niet die v mysdade
7585[regelnummer]
Jc en sout scerpelic ouer hem wreken
Op dat gi laet v quade treken
Ghi selt ouer al mijn tael houden
Ende in mijn lant van als gewouden
Als mijn souereyn baelyoen
7590[regelnummer]
Dese offici geef ic v te doen
Ghi moechse myt groter eren ontfaen
Alle reynaerts magen die by hem staen
Dancten den coninc hier off zeer
Die coninc sprac ic soud veel meer
7595[regelnummer]
Doen doer v allen dan gi waent
Jc bid v dat ghijt hem vermaent
Dat hi my vmmer sy getrouwe
Seker sprac rukenau die vrouwe
Dat sal weser zijt niet in vaer
7600[regelnummer]
Ende waert oec dattet anders waer
So en wair hi niet van onss geslacht
Jc en wouden oec krencken mitter macht
Ende ewelic sijns missaken
Reynaert danctse myt huesscher spraken
7605[regelnummer]
Den coninck hier off ende knyelde voor hem
Lieue heer sprac hi ic en ben
Der eren niet weer die gi my doet
Jc sel dair om dencken bin ic vroet
Ende v getrou sijn al mijn leuen
7610[regelnummer]
Ende altoos sulcken raet v geuen
Hier mede dede hi sijn keren
Mit sinen magen vanden coninck
Hoort hoet myt ysegrim verginck
| |
| |
7615[regelnummer]
Brwn tybert ende vrou eerswind
Sijn kijnder sijn mage ende haer gesind
Haelden wten krijt mit erren ende clagen
Ende hebben op een lettier gedragen
Van hoy dair in hi warm was ende lach
Diemen dair vant wel vijftien
Dair quamen mesters van surgien
Hi was so cranc van ziecten
7625[regelnummer]
Dat hi dat vuelen had verloren
Mer si wreuen hem myt cruut die oren
So dat hi vander onmacht onscoot
Ende gaff enen creet so groot
Dat al verscoot dat by hem was dair
7630[regelnummer]
Ende waenden dat hi verwoet was claer
Eer die meysters hem gauen dranck
Die hem dat hert dat zeer was cranck
Stercten ende hem dat rusten dede
Sy troosten sijn vrienden oec mede
7635[regelnummer]
Sy seiden hem en soude niet letten
Doe sceide dat hoff ellic ginck hem setten
Thuus te keren daen hi was comen
Ende reynaert heeft oec oorloff genomen
Aenden coninck ende synen wiue
7640[regelnummer]
Die hem baede dat hi niet en bliue
Lange hi coom weder by hem
Hy sprac vrou ende heer ic ben
Tot uwen gebode altoos bereit
Gebraeck v yet dat wair my leit
7645[regelnummer]
Van dat ic mocht volbringen
Mit lijff myt goed myt allen dingen
End dair toe al die vrienden min
Die sellen v onderdanich sijn
| |
| |
Tot allen tiden wes gi begeert
7650[regelnummer]
Wi hebben v lief gi sijts weel weert
God geef lange lijff myt eren
Jc wil tot mynen wiue keren
End tot mynen kijnderen of gijs ghebiet
Ende aldus hi vanden coninc schiet
7655[regelnummer]
Mit scoenre tael myt groter gonst
Die reynaert noch al wel cost
Jst geestelic off weerlic staet
Aen reynaert slwt men alden raet
7660[regelnummer]
Sy crupen al in reynaerts hol
Aen sijn baen is al die sol
Die stem die hem doe was gegeuen
Die is hem ye synt gebleuen
Hy heeft gelaten een groot geslacht
7665[regelnummer]
Die altoos risen ende wassen in macht
Wie reynaert kunsten niet en pliet
Die en dooch nv ter werelt niet
Jn maet off staet van machten geset
Mer kan hi crupen in sijn net
7670[regelnummer]
Off heeft geweest sijn scolier
So moet hi wonen wel hyer
So weet hi wel wat dair toe hoort
So rijst hi ende men trect hem voort
Van reynaert is een groot zaet
7675[regelnummer]
Gebleuen dat dair nv zeer op gaet
Want men vijnt nv meer reynaerd
Al en hebben sy geen rode baerd
Dan men ye dede hier te voren
Gerechticheit blijft al verloren
7680[regelnummer]
Trou ende wairheit sijn verdreuen
Ende dair voor is ons gebleuen
Ghiericheit loosheit hat ende nijt
| |
| |
Dese hebbent al in hoor beurijt
Sy ende hair coninghinne houerdy
7685[regelnummer]
Regneren nv op eerden vri
Al ist int paeus oft keysers hoff
Elck pijnt den anderen te steken off
Van sijnre eren ende stemmen
Ende selue myt vordel clymmen
7690[regelnummer]
Mit symonien ofte myt gewelt
Men kent te houe niet dan gelt
Tgelt isser meer gemynt dan got
Ende men doet meer door sijn gebot
Want wie gelt brenct is wel wel ontfaen
7695[regelnummer]
Ende sijn begeren sel voort gaen
Jst aen heren oft aen vrouwen
Tgelt doet altijt veel ontrouwen
Ende vrouwen scande beiagen
Ende mennich valsch getuuch gedragen
7700[regelnummer]
Oncuuscheit loosheit ende leckernye
Js nv alt spul onder die clergye.
Jst paeus keyser al van romen
Sijn al in reynaerts oord gecomen
Elc meent hem seluen in allen saken
7705[regelnummer]
Jc en weet wat eynd hier of sel naken
Elc mensch macht wel besorgen
God diet al is onuerborgen
Moettet op dat beste voegen
Hier mede laet ic my genoegen
7710[regelnummer]
Wat woudic veel die werelt berechten
Van saken die my self aen vechten
Dair ic ondanc toe off crege
So waert beter dat ic swege
Dair om wil icket mede liden
7715[regelnummer]
Elc doet wel in synen tiden
Dat is best sijns selfs profijt
| |
| |
Want na desen tijt coomt genen tijt
Dat men orbair dair off scaffen mach
Ende elc moet sijns selfs dach
7720[regelnummer]
Verwaren ende sijn woorde dragen
Reynaerts vrienden ende sijn magen
Namen oec oorloff aenden coninck
Ende gingen myt haren neuelinck
Meer dan veertich tot eenre sommen
7725[regelnummer]
Reynaert was blide alhier omme
Dat hem so breet was sijn steert
Ende hem die coninc had so weert
Dat hi en vercoos tot synen rade
Hy docht hier in en stect geen scade
7730[regelnummer]
Jc mach nv mitter macht mijns heren
Mijn vrienden helpen mijn viande deren
Ende mijns willen veel bedriuen
Ende des al onbegrepen bliuen
Op dat ic selue wil wesen vroet
7735[regelnummer]
Jc prijss den coninc bouen alle goet
REynaert en sijn mage te samen
Gingen so lange dat sy quamen
Tot sijn borch tot maperthuus
Dair namen sy oorloff voor sijn huus
7740[regelnummer]
Mit bliden aenschijn myt talen goet
Reynaert viel hem allen te voet
Ende dancten hem allen vriendelic zeer
Der groter gvnst der groter eer
Die sy hem gedaen hadden in sijnre noot
7745[regelnummer]
Synen dienst hi elcken boot
Mit lijff myt goede off sijs begeerden
Hier mede brocht hise aen veerden
Ende schiet van hem ellic ghinc te synen
Reynaert ginc tot vrou ermelynen
7750[regelnummer]
Dien wel blidelic ontfenck
| |
| |
Dair hi hair vertooch alle dinck
Dat hem te houe was gesciet
Een woort en liet hi achter niet
Hier off was ermelyne vro
7755[regelnummer]
Ende sijn kijnder oec also
Dat hair vader dus was verheuen
Jn groter bliscap dat sy bleuen
Reynaert sijn wijff en sijn kynder
Wie v van reynaert meer of mynder
7760[regelnummer]
Anders dan gi hebt gehoort
Dat sijn al gevensde woort
Mer dat gi hebt gelesen hier bouen
Van hem dat moech di wel gelouen
Dies niet en gelooft ist wijf oft man
7765[regelnummer]
En is niet ongelouich nochtan
Doch tsijn veel lude diet hadden gesien
Hem soude te myn twiuelen aen dien
Het sijn veel dingen gesciet
Die men gelooft al ziet mense niet
7770[regelnummer]
Mit syne figuren ende bispeel
Die geuonden ende gesciet veel
Die nye en waren noch en gescieden
Mer om exempel anderen lieden
Te geuen dat sy dair bi mochten leren
7775[regelnummer]
Duecht te doen ende quaet te keren
Licht also macht hier off wesen
So wiet wel verstaet int lesen
Al ist zom boert men vijnter yn
Wise leren ende goeden syn
7780[regelnummer]
Dat hem licht wel baten mocht
Dair en is nyement goedes in bedocht
Het is int gemeen gebrocht voort
Ellic treck hem aen dat hem toe hoort
Js dair oec yet in mysset
| |
| |
7785[regelnummer]
Diet beteren can die maket bet
Jc weets hem danck wie in sijn maken
Sijn best doet en is niet te laken
Mer wie alle dinck wil berichten
Wie soud hem yet willen dichten
7790[regelnummer]
Doch wie dit gedicht laet so hijt vijnt
En mysdoet tegens my niet twijnt
Hier neemt eynde reynaerts hystorie
God geef ons allen die hemelsche glorie
Nv Jnt gemeyn. vijnt men certeyn
7795[regelnummer]
Die reynaerts ze. nv volgen me
Al sonder saeck. Jc geef die wraeck
Hoe dattet ga. den heer hier na
Die coninck fijn. die alle pijn
Sel rechten dra. by synen ra
7800[regelnummer]
Dees reynaerts nv. dien sijn niet rv
Als reynaert is. mer zijt des wis
Het sijn al re. wi menschen le
Als ic versta. die wtten pa
Gedwaelt sijn snel. god brengse wel
7805[regelnummer]
Tsy cort off lanc. Jn themels sanc
Elc merck en zueck in synen syn
Dubbelt vijnt men sijn naem dair Jn
Diet boec screef int voorgedicht
Suecten wel ghi vijntten licht
|
|
Auteursrechtelijk beschermd