Historie van Reynaert die vos

[Cap. XXXVI.] Hoe ysegrym reynaert die hantscoe boet om te campen

UWes spottes ende schympes ontbeer ic wale ende uwer venijnder woerde felle reynaer Ghi segget ic was bi na van honger doot ende dat ghi mi inder noot lauede Dats gelogen want dat was been dat ghi mi gauet ende ghij haddet dat vleysch al schoene af ghegheten so dat daer niet een twijnt aen en was: Ende nochtan soe spotty met my Ende segghet dat ic verhonghere daer ic stae dat mijnre eren te nae gaet Wat hebdi hier mennich spytich woert voert ghebrocht mit valscher loghentale

/6729-6775/ Ende dat ic nae des conincs lijf gestaen hebbe om den schat dien ghi hem gheuen ende wysen sout in hulsterloe Ende ghij hebt oec mijn wijf alsoe bedroghen alsoe dat si ewelic onteert ende ghescandalizeert bliuen sal Ic waer ewelic onteert en wraeke ic dit op v niet Ic hebbe dat soe langhe verdraghen ghy en sijts

[fol. 94r]

niet weert ghi en moecht mi nv niet ontgaen Ic en can niet vele schoens proels Mer ick segghe v hier voer ons allen aen dat ghi een verrader sijt ende een moerdenaer dat sal ic v in een krijt op enen dach doen liden Ende dat sal wesen lijf teghen lijf. soe wort ons kijfs een eynde Siet nv hier ende neemt op den hantscoen Ic wil daer voere steruen oft dat recht sal bliuen Reynaer en conde dit niet wel geliken hij docht hoe hi hier aen quam dat hi dit campspel bestaen soude moeten tegen den groten starcken dief Alle mijn proelen sijn nv een eynde