|
| |
§ Refereyn 58.
LIef heeft om Lief alle dinck ter Węrelt ghemaect,
Lief begauende in als zeer rijckelijck,
Als eenen Lusthof is d'Eerde voor Lief gestaect,
In eewigher Liefden Lief onbeswijckelijck,
Al was Lief van Liefs ghebot wijckelijck,
Wt Liefden heeft Lief sijn Liefde ghethoont,
Ia, sijn groote Liefde authentijckelijck,
Heuet d'Eerde veruult, en Lief verschoont,
Lief voor sijn Bruyt lieflick int hoochste ghecroont,
Liefs liefde was veel stercker dan de Doot,
Om Lief te verlossene, is Lief onghehoont
Wt sijns Uaders rijcke nederghedaelt in Liefs schoot,
En heeft het steruen wt vierigher liefden groot
Aengheveert lieflijcke, daer en cost gheenen rou zijn,
Gheuende Lief volcomen Troost minjoot,
Daerom sal Lief, in Liefden ghetrou zijn.
Lief was in den Thoren van Liefs Uadere,
Maer Lief heeft hem om Lief ghereconcilieert,
| |
| |
Met sijnen Bloede de leuende Adere,
Naeckt en cranck lach Lief in d'asschen ghecorrumpeert,
Maer Lief heeft Lief crachtich gheconforteert,
En t'Cleedt der Ureuchden Lief omghehanghen:
Liefs Ontweebrekinghe gheheel ghecureert,
Compt Lief (roept Lief) wilt om niet ontfanghen
Water des Leuens, ick blusch al dijn verlanghen,
Al zijdy belast, ick sal v ontladen,
U cussende met mijn bloetverwighe Wanghen,
Dijn Melaetschap ghenes' ick vol van Ghenaden,
U hongherighe Siele sal ick versaden,
Met het Hemelsch Broot, wilt van boosheyt schou // zijn:
Dit versekert Lief sijn Lief met staden,
Daeromme sal Lief in liefden ghetrou // zijn.
Lief wilt van my leeren (spreect Lief warachtich)
Dat ick ben Sachtmoedich en Goedertieren,
Blijft toch in mijnder Liefden eendrachtich,
Met mijn Glorie sal ick v vercieren:
Onderhout mijn Gheboden en manieren,
Totten eynde toe wilt volstandich blijuen,
Willen v die Boose druckich schoffieren,
Haer quaet voornemen sal ick wtwrijuen,
En v traenkens van v Wangskens drijuen,
Mijn eewighe Blijschap maeck ick v spoedich,
Als de Sonne claer sal v Licht beclijuen,
Blijft vast gheplant in mijn Liefde gloedich,
Uoor alle Dangier ben ick v behoedich,
Al moghen de Boose ouer v wat bou // zijn:
Hoort dees liefde thoont Lief zijn Lief ouervloedich,
Daeromme sal Lief, in liefden ghetrou // zijn.
| |
| |
| |
§ Prince.
Princelijcke Lief reyn Minnaer amoureus,
Ghy hebt om v Lief den Doot verslonden,
Ts'Uyants Cracht ghebroken zeer victorieus,
En Lief verlost, de Banden ontbonden,
Met uwen Bloede Liefs Salicheyt vonden:
Maer Lief moet Lief wesen ghetrou alleene,
Gheen ander beminnen, want naer tschrifts vermonden,
Lief is een jaloers Liefhebber ghemeene,
Lief heeft om Lief alle Druck en Weene
Goetwillich gheleden, en sijn Lief verheuen,
Liefs Cleedt wit ghewasschen in sijn Bloet reene,
D'eewich Rijck, is bereyt, en salt Lief gheuen,
Blijft Lief, Lief ghetrouwe in Liefden beseuen,
Gheduerich altijt, sy en mach niet schou // zijn,
Want Lief gheeft Lief voor de Doot het Leuen,
Daeromme sal Lief, in Liefden ghetrou zijn.
|
|
Auteursrechtvrij