Refereynen ende liedekens
(1563)–Anoniem Refereynen ende liedekens–
AuteursrechtvrijBruessel.
| |
[Folio 129v]
| |
Elck wilt hem nu metter Schriftueren moeyen,
En elck wiltse nae sijns selfs Sin verstaen,
Wa, ghelooft in Godt diet al doet groeyen,
Diet voor ons al heeft vervult en voldaen:
En wilt uwen euenen Naesten niet versmaen,
Maer doet hem als v seluen, seyt die Heere.
Is uwen Naesten belast, met druck bevaen,
Staet hem by, troost hem van sijnen Seere,
Is hy cranck, besoeckt hem: t'is v eere.
Heeft hy hongher oft deurst, wilt hem spijsen:
Alsoo ghy wilt dat v ghebeurt t'elcken keere,
Dat selue suldy uwen Naesten bewijsen,
Dit is de rechte Liefde niet om volprijsen:
Dat elck Liefde hadde alsoo sy souwen,
De landen souden in Rusten verjolijsen,
Liefde bringt Eendrachticheyt by mans en vrouwen
Want oprechte Liefde can Peys en Uré houden.
Uande Schriftuere hoortmen elck nu spreken,
Segghende, dit staet hier gheschreuen, en dat daer:
T'willen al Doctoren zijn gheleken,
Maer sy en volghen de Liefde niet naer,
Want sy bedrucken malcanderen voorwaer,
Elck dunckt sijn Ghelooue d'beste wesen:
Broeders en wilt soo diep niet dubben, maer
Wilt uwen Credo zeer wel deurlesen,
En uwen Uader onse, hooghe gheresen:
Achtervolcht dien, en houdt v daer ane,
En v Thien Gheboden, als nu ten desen,
Daer staet, Bemint alleen (met corten vermane)
Eenen Godt, uwen Naesten pijnt by te stane,
| |
[Folio 130r]
| |
Als v seluen het wordt v vergouwen,
Hebt hem lief, pijnt hem in ootmoet te ontfane,
Oft doedy anders, het sal v berouwen,
Want oprechte Liefde can Peys en Uré houwen.
| |
§ Prince.Prince, men sietse nu vechten en strijen,
D'een teghen d'ander om t'Ghelooue te uyten,
Soo datter veel bedruckt wordt sonder vermijen,
In Steden, Dorpen binnen en buyten,
Om t'Ghelooue sietmense op sluyten,
Dus bedruckt t'Uolck malcanderen onbekint,
Is dat de Liefde ghy simpel Spruyten?
Siet oft ghy dat in uwen Uader onse vint,
Oft in uwen Credo, en Gheboden omtrint:
Daer staet, Hebt hem lief, en zijt te vreden,
Doet hem als v seluen, O Menschen verblint,
Woudy wel datse v sulcken quaet deden?
Neen ghy voorwaer: dus breeckt dan v quade seden,
Doet hem als v seluen, wiltet t'Uerstant knouwen,
Bewijst hem Liefde, t'werdt v ghebeden,
Wildy salich zijn, en hebt op Godt betrouwen,
Want oprechte Liefde can Peys en Uré houwen.
| |
§ Liedeken op de wijse,
| |
[Folio 130v]
| |
Hy is zeer vriendelijcke,
Dus meuchdy hem louen wel,
Sijn Goetheyt is oneyndelijcke,
Want hy en is niet fel,
Dus loeft hem met Sanck en Spel.
Hy is lanckmoedich en ghenadich,
Want ons en is niet gheschiet,
Nae ons Sonden, en is hy ons niet versmadich,
Hy en ghedinckse niet,
Want hy helpt ons wt verdriet.
Alsoo bermhertich als eenen Uader,
Is ouer sijn eyghen Kint,
Soo bermhertich is hy allegader,
Die hem vreesen, die versint,
En dat is sijnen Urient.
Want alsoo hooghe als bouen der Erden
Den Hemel hooghe staet,
Laet hy sijn Goetheyt ghewerden
Aen die hem vreesen, sonder verlaet,
En suchten voor haer Misdaet.
Alsoo verre als Oosten en Westen,
Al van malcanderen gheet,
Soo verre doet hy ons sondighe resten
Uan ons, wijt en breet,
Den ghenen diese zijn leet.
Hy kent, en hy weet alleene
Waer af wy zijn ghemaeckt,
| |
[Folio 131r]
| |
Uan tghestof der Eerden ghemeene,
Zijn wy gheschapen naeckt,
En als Hoy ons Lichaem laeckt.
| |
§ Prince.Prince wilt hem louen en prijsen,
Want voorwaer sy dolen al,
Die ons tot eenen anderen wijsen,
Sijn Bermherticheyt niet eynden en sal,
Sy is sonder Ghetal.
|
|