Refereynen ende liedekens
(1563)–Anoniem Refereynen ende liedekens–
AuteursrechtvrijT'Kerssouken van Audenaerde residerende in Pamele.
| |
[Folio 117v]
| |
In dit Eerdtsche Foreest,
Maer Godts Woordt, dat v soo soetelijck can leeren,
Wilt dat hooren, en beleuen tot s'Lofs vermeeren,
Soo meughdy onbevreest,
Nae Paulus raet wandelen inden Gheest,
Den Heere volghen, in ootmoedigher Seden:
Want wie vleeschelijck ghesint is, hy treckt en teest,
Deur Hoouerdije nemmermeer te vreden.
Hoe menighen Camp werter nu ghestreden,
Om dat Ghehoorsaemheyt is wten Lande,
Tseghen de Hoofden willen opstaen de Leden:
Ootmoedicheyt dinckt nu elcken een schande,
Nochtans seydt Petrus als de Uaillande,
Weest ghehoorsaem Kinders, en wilt v swichten,
Want ick segghe soo den Gheest raedt met verstande,
Ghehoorsaemheyt can d'Landt in Ruste stichten.
Den Coninck sal den Heere louen en prijsen,
Als onderdanich subdijt, met reynder ghijsen,
In s'Deuchts beghęeren,
T'Ghemeente en sal oock van hem niet dijsen:
Maer de Officiers alle eere bewijsen,
Soo en compter gheen dęeren
Uan Tweedracht: maer elck in sijn affęeren
Sal te Ureden wesen watmen sal ghebien,
En int bidden moet hem elck Christen Ledt ghenęeren
Dat ons wijsen voorsienighen Raet mach gheschien,
Gods vreesende, die vanden weghe niet en vlien:
Als elck dus met Redenen bedient sijnen Staet,
Sal den Coninck met sijn volck eendrachticheyt sien,
Maer is t'Ghemeente beuonden rebel en quaet,
| |
[Folio 118r]
| |
Soo sal den Twistmaker daer in stroyen sijn saet,
Dus ist Heere oft Prelaet, aenhoort mijn dichten,
Elck wilter hem af wachten, vliet boosen raet,
Ghehoorsaemheyt can d'Landt in Ruste stichten.
Willen wy dan leyden een vreedsamich Leuen,
Elck sal hem onder de protectie gheuen
Uanden Magistraten,
Oft anders soo moeten de Landen sneuen,
Daer onghehoorsaem werck werdt bedreuen
Uanden Ondersaten,
D'Wijf moet den Man subieckt zijn sonder laten,
En t'Kint sijnen Uader met wijse Sinnen,
Knapen, Maerten moeten oock ditte vaten,
Meester en Urouwe als haer seluen beminnen,
Daer ditte ghebeurt, sal de Liefde winnen,
En den Twist versijghen in alder manieren,
Schout Tweedracht wie ghi zijt van buyten of binnen
Want daer Pays in d'Lant is, moet God logieren:
Laet ons dan sijn Ordonantien vieren,
Die contrarieren, werden verdoemde wichten,
Ick seght voor de Waerheyt, t'en is gheen verzieren,
Ghehoorsaemheyt can d'Landt in Ruste stichten.
| |
§ Prince.Prince, Godt selue als eenen Spieghel reene,
Is hier ghecomen in dit Dal van weene,
En gheworden subieckt,
Exempel tooghende groot ende cleene,
Ghy Menschen vermurwet, oft zijdy van steene,
Hy die was onbevleckt,
Werdt ghesmeten, ghesteken, bespot, begheckt,
| |
[Folio 118v]
| |
En verdroecht zeer minnelijck te dien stonden,
Sullen wy dan snoo vaetkens die zijn imperfect,
Ruste wanen vinden met ander vonden?
O neen: Schriftuere can ons lieden orconden
Dat den Knecht sijnen Meester moet volghen ter noot,
Was Christus niet ghehoorsaem, willet vermonden,
Och iaey, ghehoorsaem tot aen t'Cruyce bloot:
Daer hy voor de Sondaers aen smaecte de Doot,
Als een blinckende Claerheyt tot ons verlichten:
Dus gheu'ick noch Solutie voor cleyn en groot,
Ghehoorsaemheyt can d'Landt in Ruste stichten.
| |
§ Liedeken op de wijse,
| |
[Folio 119r]
| |
Daniel Godts Knecht vercoren,
Werdt vertroost, dus verjolijst.
Helias niet verloren,
Oock vander Raue ghespijst:
Wie sachmen noyt verlaten,
Hoe dat sy waren benout,
Hy compt se al ter baten,
Die in hem hopt en betrout.
Den Man aen die Piscijne,
Die dryendertich iaer lanck
Gheleghen hadde in pijne,
En t'Urouken met den Bloetganck,
Deur t'Ghelooue ghepresen
Quamen sy al wt verdriet,
Godt heeftse reyn ghenesen,
Dus ghy Menschen en twijfelt niet.
Centurio der ghelijcken
Badt oock voor sijnen Knecht,
Sijn Goetheyt moest daer blijcken
Aen t'Urouken dat quam int Recht,
Met Ouerspel bevonden,
Maer was verlost van dien:
Lof, Prijs tot allen stonden
Soo moet v Heere gheschien.
Aensiende dees Weldaden,
O Menschen cleyn en groot,
Zijdy te zeer gheladen
Met Packen der Sonden snoot,
Hy sal v wel verlichten:
Want hy is veel te goet,
| |
[Folio 119v]
| |
Dus wilt van weenen swichten,
Merckt wat die Heere doet.
Dauid en Magdaleene
Droncken van sijnen Wijn,
Sy werden net en reene.
Petrus en Mattheus fijn,
Sacheus sonder falen,
Den Moordenare voorwaer
Moesten al Salicheyt halen
Wt dees Fonteyne claer.
| |
§ Prince.Prince en wilt niet meer suchten
Maer schouwet s'Węrelts samblant,
Het zijn al ijdel cluchten,
Wilt verstercken v verstant
In dat Cruyce des Heeren
Met Paulus zeer diligent
Dat wy hier naer verkeeren
In Godts Rijcke excelent.
|
|