Refereynen ende liedekens
(1563)–Anoniem Refereynen ende liedekens–
AuteursrechtvrijMechelen. Peoene.
| |
[Folio 115r]
| |
Waer Eenheyt niet en is, en can gheen wesen zijn
Dwelck men mach Goet noemen: want t'Godlijck ghehinghen
Schiep eerst wesen, daer nae Eenheyt gepresen // fijn
En Goetheyt tsamen: cause alder dinghen
Uan hem al Goet gheheeten, int volbringhen
Elck haer propre Natuere: dus hebdy voorwaer
Dat d'Wesen der goeder Eenheyt sonderlinghen
T'hooft van Rusten is, en sy can elck Lant, dats claer,
Deur haer Goetheyt, wel in Ureden houden: en daer
Dees faelgeert, sietmen sulcx deur Onruste laken:
Want waer gheen Eenheyt en is, daer moet openbaer
Meerheyt wesen, tweeschillinghe in veel saken:
Den Landen daer d'Eenheyt scheet sal ghequel naken:
Deur diuersche veranderinghe werdt verspout
Ghelijckheyt, en onverandertheyt maken
Eenvoldighe sterckte, daer dees is, niet en grout,
D'Wesen der Eenheyt goet, elck lant in Rusten hout:
Wat mocht den Landen beters toeghecomen // dan
Een oprecht Wesen, borgherlijck Regiment,
Dwelck d'Ondersaten goetwillich vervromen // can,
En houwet al in Rusten zeer conuenient:
Maer een Rijck, dat deur eenich discoorts accident
Gescheurt wort, moet mits fauten der Eenheyt vergaen:
Want ghelijck by Accoorde, alle dinghen jent,
Hoe cleene groot worden, en in vrientschappen staen,
Soo sietmen van wesene groote dinghen saen:
By Discoorde in desolatie sneuen,
Want deur d'onledich gheschil, comt den Landen aen
Ghevecht, Destructie, Schreyen en heuen,
| |
[Folio 115v]
| |
Nu diuerscheyt: Eenheyt, en Goetheyt verheuen
Moeten in wesen zijn, eermen yet, ionck oft out,
Goet, Quaet, Ruste oft Onruste hier int Leuen
Noemen mach, dan beuintmen die weynich betrout,
D'Wesen der Eenheyt goet, elck lant in Rusten hout.
| |
§ Prince.Wel den Uolcke die in sulcke Landen // woonen,
Daer de goede Eenheyt in Wesen triumpheert,
Als Gouuernante: can sy d'mishanden // schoonen
Der Ongherustheyt, en alle dinck conuerteert
Sy tot Rusten: wat ter Węrelt ongheregeert
Sonder Opperste is, deur Abdicatie,
Der Eenheyt falen, midts dat niet en defendeert:
Want ghelijck de Natuere t'elcker spatie,
Een moet zijn, soo heeft sy elck Wesens Natie
Uan Natueren al, in Eenheden ghestelt: want
Ghelijck Siel en Lichaem, een Congregatie
Tsamen maken, en zijn Een nae den schijn constant
Der Lichaemheyt: maer tsuppost faelt wanneer den bant
Des Wesens scheet, soo compt den Landen menichfout
Oock quellinghe toe, daer t'goet Wesen playsant
Der Eenheyt scheet: dus seg ic wie datter voor flout,
D'Wesen der Eenheyt goet, elck lant in Rusten hout.
| |
§ Liedeken.LAet ons nu den Heer der Heeren
Louen, weerdt alder Eeren,
Met eenen Nieuwen Sanck,
En t'Herte van Sonden keeren,
Godt sal ons oude Seeren
| |
[Folio 116r]
| |
Ghenesen, eer yet lanck,
Daer menich cranck
Den tijt in heeft versleten,
Die Ghenade schanck,
Seght toch al Danck
Godts Goetheyt onghemeten.
Uoor ons is d'Woordt Uleesch gheboren,
Om blusschen s'Uaders Thoren,
Ueel Smaden hy ontfinck,
Anders waer bleuen verloren
Salem sijn Wtvercoren,
Daer hy naeckt bespot hinck,
Schonck den Trouw-rinck
Der Bruyt sondich beseten,
Te ghemoet haer ghinck,
Noyt beter dinck
Godts Goetheyt onghemeten.
Almachtich en goedertieren
Is Godt in veel manieren,
Een Heer alleen publijck,
Uoor den Mensch ghinck hy bestieren,
Tghewelt der Helscher Ghieren:
Goetgrondich autentijck
Uoor Erm en Rijck,
Nae d'woordt sijnder Propheten,
Prijst alle ghelijck
In elcken Wijck
Godts Goetheyt onghemeten.
De Heer der Hemelscher Hęren,
Heeft ons comen verghęren,
| |
[Folio 116v]
| |
Deur een oprecht versoeck
Soo onder s'Hinnekens vęren
Den Kieckens niet can dęren,
Al is zeer wilt den hoeck,
Midts d'onreyn doeck
Liet sijn Herte deurspeten:
Doen dé open d'Boeck
Des Leuens cloeck,
Godts Goetheyt onghemeten.
Onsen Godt groot en vervaren
Heeft in voorleden Iaren,
Crachtich ghethoont sijn werck,
Hy sloech de Egypsche scharen,
Tot Israels ghesparen,
Dwelck is de Christen Kerck,
Daer Christus sterck
Den Doot voor heeft verbeten,
Singht Eer, Leeck en Clerck,
Deur dit ghemerck,
Godts Goetheyt onghemeten.
Eewich en oock t'allen ueren,
Bermhertich van Natueren
Is Godt op Adams struyck,
De Misdaet quam hy besueren,
Sijn Liefde wracht t'volvueren
Wt Eden, tschoon beluyck,
En heeft den Buyck
Des Ueurghebochts ghespleten,
Uoor tsondich ghesmuyck
Creech elck t'ghebruyck
| |
[Folio 117r]
| |
Godts Goetheyt onghemeten.
Den Gheest doet hy iubileren,
Druck, lijden mitigeren,
Maer t'dunckt der Węerelt gheck:
In Pharaos agonizeren
Quam hyse assisteren
Al naer sijn soet bespreck,
In hen ghebreck
Gaf hy haer Broodt om eten:
Tot Lof buycht den neck,
Sonder vertreck,
Godts Goetheyt onghemeten.
| |
§ Prince.Ghy gheloouighe Princieren,
Wilt Lofsanck cryieren,
Ontsprinckt wt des drooms vaeck,
Uier, Locht, Eerde en Riuieren,
Moeten in dees duwieren,
Hem eeren, want t'crijcht smaeck,
Uoor ons houdt waeck,
Sijn Wijsheyt in secreten
Uernielt heeft den Draeck,
Danckt int ghemaeck
Godts Goetheyt onghemeten.
|
|