Refereynen ende liedekens

§ Refereyn 49.

Liere.
Groeyenden Boom.
In Deuchden voort.

GOd wiens wonder wercken zijn om gronden // niet,
Heeft gegheuen elck mensch hier eenen wille // vrij,
Tot Goet en Quaet, maer die oyt loose vonden // riet,
Dats den vyant, waer deur men d'lant vol sonden // siet,
Nu d'een, morghen d'ander comt met gheschille // blij,
Sectelijck draeyende t'Uyants spille // blij,
Hier blasphemie, daer dootslach moordadich // quaet,

[fol. 112v]

 

Wie oft wat can tmaken dat elck Lant stille // zij,

 

Tuycht in my Heere, reyn Godlijck sucadich // saet,

 

Ureesden sy v Wet, waer in soo ghenadich // staet:

 

Bemint v Naeste in eeren // sedelijck

 

Als v seluen, daert al om nu versmadich // gaet,

 

Tsouwer haest in Rusten verkeeren // vredelijck,

 

Leefde elck eene naer s'Wets leeren // redelijck:

 

Ruste en Urede sou elck Landt aencleuen // schier,

 

Ia, vast houwe, dwelck can vermeeren // edelijck

 

Godts vreesende Wet voor elck ghegheuen // hier.

 

 

 

Daermen God vreest, vreestmen ts'wets geboden, net,

 

Want die daer gheseyt heeft, begeert niemants goet // groot,

 

Die selfste seyt oick, laet v niet nooden // vet

 

Tot Offer diemen voor den Afgoden // set,

 

Mint God bouen al, noch en stort gheen bloet // root:

 

Want wie in een sondicht, die misdoet // bloot

 

In de gheheel Wet, noch eest t'Schrifts verhalen // al

 

Ghy Rijcke keert niet den weesen in ontspoet // thoot,

 

Weet die tgoet loont, dat hy tquaet oock betalen // sal:

 

Want Onruste sietmen mistich stralen // mal

 

Inde Landen daer Godts Wet wt gheroeyt // leyt,

 

En soecken nieu Werten, waer deur moet falen // smal

 

Goede Ruste, die haer als Ceder ghegroeyt // spreyt:

 

Daermen Godts Wet houdt, dats d'Lant daermen gheschoeyt // reyt

 

Met d'Euangelie des Ureedts gheschreuen // dier,

 

Om s'Lants Ruste is (so schriftuer ghemoeyt // seyt)

 

Godts vreesende Wet, voor elck ghegheuen // hier.

 

 

 

Want Gods Wet can der Liefden wercken // wijse,

 

Ierst d'Ouerheyt om voeren het Recht // reene,

[fol. 113r]

 

Waer deur Rust en Uré moet t'allen percken // rijsen,

 

Sy leert troosten, lauen den ontstercken // spijsen,

 

Den saldaden seyt sy, gaet int gheuecht // gheene,

 

Oudt noch ionck, slaue, vrije, oft knecht // cleene,

 

Hebt Liefde en Urede, want soo behoort // dat:

 

Salomon seyt, elck heb dees Wet ghehecht // eene

 

Aen sijn cleeren, ia int herte tot confoort // bat,

 

Der Landen sal rust zijn, die waren verstoort // mat:

 

Ia, den Urede sal als ees Peerle claer // blincken,

 

Sy straft die Gulsighe die loope versmoort // sat.

 

Broers seyt si, wilt d'een dan d'voor oft naer // crincken

 

Paulus seyt, sy is heylich, wilt op haer // dincken,

 

Haer eynde is Christus, ons hooft, ons leuen // fier,

 

Ruste in alle Landen can voorwaer // wincken

 

Gods vreesende Wet, voor elck ghegheuen // hier.

§ Prince.

Dauid seyt, Heere want my ontsterflijck // luste

U Wet voor elck om wandelen subiect // want
Daermense houdt, daer houwet Lant erflijck // ruste:
Want dat Pax Iustitia, conserflijck // custe,
Dat dé Gods Wet, daer elck in soo perfect // vant:
Hebt Urede, Ruste sal houden t'heel correct // Lant.
Staet daer niet, elc Dier moet sijns gelijcke // minnen,
Dees Wet eest t'Spieghel tsuyuer ongheplect // pant
Dat Rust en Uré houdt in elcken Rijcke // binnen:
Tgoet doen, tquaet in elcken wijcke // kinnen
Dattet Gods wet verbiet, elck hebber grouwen // van,
Dyer in sondicht moet (Ach) ten flijcke // rinnen:
Want d'oorsaec des doots bringt si mans en vrouwen // an,
Deur t'Ghebot tot den Leuen, wilt betrouwen // dan:
Daer d'Landt om twistmaken is euen // ghier,

[fol. 113v]

 

Onderhieltmen (dwelck d'lant in rusten houwen // can)

 

Gods vreesende Wet, voor elcke ghegheuen // hier.

☞ Liedeken op de wijse, O Tyrannich werck
vol erchs ghedronghen. etc.

DEn nacht is voorby, den dach licht schoone,
Staet op en wandelt in des Heeren Wet,
Die uere is hier, ontfanght de Croone:
Lieue Broeders worpt af t'vuyl Iock besmet,
Wordt al herboren, heel van Sonden net,
U seluen set
Hier inder Proeuen met alder ootmoet,
Om rusten eewich in den Heere soet.

Om Ruste eewich wilt laboreren,

Ghy vindtse al in dat beloefde Lant,
Daer al Godts Heylighen triumpheren,
Noyt Oore en hoorde die Blijschap, want
Oft Ooghe en saecht dyer Ureucht playsant:
Dus met Uerstant
Uerlaet dat Quade, en verkiest dat Goet,
Om rusten eewich in den Heere soet.

Het Thresoor des Ureedts is ons ontsloten,

Deur Christum steruende ons Aduocaet,
Den Soenpenninck heeft hy net gheschoten,
Waer deur ons d'Landt van Rusten open staet,
Die Heer ontfangter elcken vroech en laet,
Dus tot hem gaet,
En strijdt volheerdich teghen Uleesch en Bloet,
Om rusten eewich in den Heere soet.

Wy en hebben hier gheen Landt om blijuen,

Daer Ruste oft Uré woont, maer wel Discoort,

[fol. 114r]

 

Elck neem dan wel waer, naer Paulus schrijuen,

 

Sijnen Roep, om hier gaen in Deuchden voort:

 

Soeckt doch dat Hemels is, naer Christus Woort,

 

Sijn Stemme hoort,

 

Ureest ancxt, perijckel, swęerdt, water, noch gloet,

 

Om rusten eewich in den Heere soet.

 

 

 

Ick ben bermhertich, soo seydt die Heere,

 

Dus doch elckanderen bermhertich zijt,

 

Quetst Oog' om ooghe voort aen niet meere,

 

De Wrake hoort mijne, schout Haet en Nijt,

 

Oft mijn Ghenade suldy worden quijt,

 

Nae deser tijt:

 

Dus doet wel den ghenen die v misdoet,

 

Om rusten eewich in den Heere soet.

 

 

 

Wilt v niet hooghe hier estimeren,

 

Oft oock wijs zijn by v seluen bekent,

 

Want die hem verheft, sal Godt verneren

 

In den Dach des gherechtichs Iugement:

 

Zijt als Kinderkens cleyn den Heer omtrent,

 

Loos als t'Serpent,

 

Teghen t'sondich brieschen, en t'vyants Woet,

 

Om rusten eewich in den Heere soet.

 

 

 

Elck laet hem vredelijck wel ghenoeghen

 

Met sulcx, oft t'ghene dat de Heere gheeft,

 

En sonder ommesien moet ghy ploeghen:

 

Want Christus dat elcken beuolen heeft,

 

Sterft hier v seluen, en den Heere leeft,

 

Dus niet en sneeft,

 

Maer maeckt v vruchtbaer, noyt beteren spoet,

 

Om rusten eewich in den Heere soet.

[fol. 114v]

§ Prince.

Hooch Prince Heere, los van gheschille

Moeten wy al zijn, Ia, hiel onbevleckt:
Segghende, Heere niet mijnen Wille,
Maer den uwen doch in den onsen streckt:
Want wy moeten wesen also perfeckt
Uan v verweckt,
Souwen wy ontfanghen der Ureuchden hoet,
Om rusten eewich in den Heere soet.